سىرتقى ىستەر مينيسترلىگىنىڭ سيرياداعى اتىستى دوعارۋعا بايلانىستى مالىمدەمەسى

قازاقستان رەسپۋبليكاسى سىرتقى ىستەر مينيسترلىگىنىڭ سيريادا اتىستى دوعارۋ جونىندەگى ۋاعدالاستىقتار تۋرالى مالىمدەمەسى جاريالاندى دەپ حابارلايدى «The Qazaq Times» ۆەدومستۆونىڭ سايتىنا سىلتەمە جاساي وتىرىپ.

مالىمدەمەدە، سىرتقى ىستەر مينيسترلىگىنىڭ سيريا اراب رەسپۋبليكاسىنىڭ بارلىق اۋماعىنداعى اتىستى دوعارۋ جانە ۇكىمەت پەن قارۋلى وپپوزيتسيانىڭ رەسەي فەدەراتسياسى مەن تۇركيا رەسپۋبليكاسى كەپىلگەرلەر بولىپ شىعاتىن بەيبىت كەلىسسوزدەردى باستاۋعا ازىرلىگى تۋرالى ۋاعدالاستىقتاردى قۇپتايتىنى جايلى ايتىلعان.

سونداي-اق، «سيريا ۇكىمەتى مەن قارۋلى وپپوزيتسيا اراسىنداعى اتىستى دوعارۋ تۋرالى»، «اتىستى دوعارۋ رەجيمىنە باقىلاۋ جونىندەگى شارالار كەشەنى تۋرالى»، «سيريالىق رەتتەۋ جونىندەگى بەيبىت كەلىسسوزدەردى باستاۋعا ازىرلىك تۋرالى» ءۇش قۇجاتقا قول قويىلۋى سيريالىق داعدارىستى شەشۋ جونىندەگى ءىس جۇزىندەگى ارەكەتتەر ءۇشىن شىنايى نەگىز بولۋعا قابىلەتتى دەپ سانايمىز.

جوسپاردى بىرىككەن ۇلتتار ۇيىمى جانە اراب مەملەكەتتەرى ليگاسىنىڭ ارنايى وكىلى ستاففان دە ميستۋرا مەن سيريادا ۇرىس ارەكەتتەرىنىڭ تەزىرەك دوعارىلۋىنا مۇددەلى باسقا تاراپتار قولداعانى ماڭىزدى.

وسىعان بايلانىستى ءتيىستى كەلىسسوزدەردى استانادا وتكىزۋگە قازاقستان پرەزيدەنتى نۇرسۇلتان نازارباەۆتىڭ جاريا ەتكەن ازىرلىگىمىزدى راستايمىز. كەلىسسوزدەردى وتكىزۋ تەك اتىستى دوعارۋ رەجيمىن جوسپارلى تۇردە ساقتاۋ جاعدايىندا عانا مۇمكىن بولاتىنىن تۇسىنەمىز.

سوڭعى ۋاعدالاستىقتاردىڭ سيرياداعى تولىققاندى ساياسي ۇدەرىستى بۇۇ قاۋىپسىزدىك كەڭەسىنىڭ 2254 (2015) قارارىنا سايكەس قايتا جاڭعىرتۋعا مۇمكىندىك بەرەتىنىنە سەنەمىز.

قازاقستان ءارى قاراي دا حالىقارالىق قاۋىمداستىقتىڭ ءتيىستى كۇش-جىگەرلەرىنە، سونىڭ ىشىندە 2017 جىلدىڭ 1 قاڭتارىنان 2018 جىلدىڭ 31 جەلتوقسانى ارالىعىندا بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ىقپال ەتۋگە ءازىر» دەلىنگەن.

استانا، 30 جەلتوقسان 2016 جىل