14 qañtarda Wlttıq qauipsizdik komiteti birinşi prezident Nwrswltan Nazarbaevtıñ nemere inisi Samat Äbiştiñ demalısta ekenin, qızmetinen ketpegenin mälimdedi. Bwl turalı Ortalıq Aziya jañalıqtar qızmeti jazdı.

6 qañtarda key telegram-arnalar WQK törağasınıñ birinşi orınbasarı Samat Äbiştiñ wstalğanın habarlap, artınşa aqparattı joqqa şığarğan.

"Kelip tüsken swraularğa säykes, WQK törağasınıñ birinşi orınbasarı Samat Äbiş öz qızmetinde ekenin habarlaymız. Qazirgi uaqıtta ol jıl sayınğı demalısında" delingen WQK habarlamasında.

Eldegi qayğılı oqiğalardan keyin WQK basşılığı özgergende Samat Äbiş turalı eşteñe aytılmağan, tek komitet törağasınıñ orınbasarı qızmetine jaña orınbasardıñ tağayındalğanı aytılğan. WQK-nıñ resmi saytında Samat Äbiş WQK törağasınıñ birinşi orınbasarı dep körsetilgen.

Elde prezident Qasım-Jomart Toqaevtıñ biligi küşeyip, birinşi prezident Nwrswltan Nazarbaevtıñ biligi "älsiredi" degen boljam keñinen taray bastağan şaqta Nazarbaev pen jaqındarınıñ körinbey ketkeni jaylı aqparattar jiilegen. Keyingi kezde joğarğı bilikte otırğan Nazarbaevtıñ tuıstarınıñ köbi "demalısta" nemese "densaulığına baylanıstı jwmısına kelmegeni" jaylı aqparattar jii şığıp jatır.

Eks-prezidenttiñ ülken qızı, mäjilis deputatı Dariğa Nazarbaeva parlamenttiñ birneşe otırısına qatıspağan. Kömekşileri onıñ koronaviruspen auırıp jatqanın habarladı.

Bwğan deyin aqparat qwraldarı eks-prezidenttiñ inisi Bolat Nazarbaevtıñ qazaq-qırğız şekarasınan ötkeni, Manas äuejayı arqılı Dubayğa wşıp ketkenin jazğan. Biraq tuıs-jaqındarı da, Qazaqstan biligi de bwl aqparattı rastağan da, teristegen de joq.

Osığan deyin jurnalist Arkadiy Dubnov Facebook-tegi paraqşasında Nazarbaevtıñ tağı bir nemere inisi Qayrat Satıbaldınıñ Dubayda wstalğanın, al eks-prezidenttiñ özi Qıtayda ekenin jazğan. Biraq bwl aqparat resmi türde rastalğan joq.

Nwrswltan Nazarbaevtıñ özi jwrt aldına 2021 jıldıñ 28 jeltoqsanınan beri şıqpağan. Ädette eldegi mañızdı mäselelerge pikirin aytıp otıratın Nazarbaev qañtardağı oqiğağa baylanıstı pikirin bildirgen joq. Osığan deyin bwrınğı prezidenttiñ baspasöz hatşısı Aydos Ükibay Nwrswltan Nazarbaevtıñ Qazaqstannan ketpegenin, astanada ekenin aytqan. Onıñ aytuınşa, Nazarbaev "birqatar konsul'tativtik kezdesuler ötkizip, prezident Qasım-Jomart Toqaevpen tikeley baylanısta otır".

Qazaqstanda 2 qañtarda bastalğan narazılıq şaraları şamamen bir aptağa sozıldı. Oğan swyıtılğan gazdıñ qımbattauı sebep bolğan. Narazılar özge talaptarmen birge otstavkağa ketse de, sayasi ıqpalın saqtap qalğan 81 jastağı Nwrswltan Nazarbaevtıñ bilikten tolıq ketuin de talap etken.

Narazılıqtıñ soñı Qazaqstannıñ Täuelsizdik tarihında bwrın-soñdı bolmağan iri tärtipsizdikke wlastı. Jüzdegen adam ükimet ğimarattarına barıp kirip, keybiri örtendi. Sauda jäne qızmet körsetu orındarı tonaldı. Kölikter audarıldı.

Prezident Qasım-Jomart Toqaev elde tötenşe jağday engizgen. Bilik tärtipsizdikti wyımdastıruşılardıñ artında "halıqaralıq terrorister bandası twr" dep mälimdedi. Toqaev WQŞW-dan äskeri kömek swrap, izinşe elge WQŞW-nıñ birneşe mıñ soldatı kirdi (13 qañtardan bastap WQŞW äskeriniñ şığarıla bastaytını habarlanğan). Sarapşılar Nazarbaev jaqtastarımen teketires uşıqqan şaqta WQŞW äskeriniñ arqasında Toqaev bilikti uısında saqtap qaldı dep sanaydı.