Almatı qalasındağı Ortalıq klinikalıq auruhanasınıñ jansaqtau böliminde koronavirustıñ asqınğan türimen auırıp jatqan nauqastar. 15 şilde 2021 jıl. Foto: QT / Kültegin Aspanwlı

Almatı qalasında törtinşi tolqın qaupi arta bastadı. Astanadan keyingi eñ köp nauqas anıqtalıp jatqan öñirde auruhanağa tek jağdayı auır adamdar ğana jatqızılıp jatır. Qazirgi tañda rezervtegi tösek-orında qosa eseptegende 44% orın tolğan.

Qoğamdıq densaulıq saqtau basqarmasınıñ mälimetinşe, ötken täulikte tirkelgen 885 adamnıñ 780-inde simptom belgileri bar, tağı 105 adam simptomsız türde auırğan. 15 şildede 318 adam auruhanağa jatqızılğan.

Jalpı qalada 2516 adam ambulatorlıq deñgeyde emdelude jäne sıyımdılığı 5200 orın bolatın infekciyalıq stacionarlarda 2292 adam emdelip jatır. Olardıñ arasında jağdayı jeñil äri orta deñgeydegi balalardıñ sanı kürt artıp, 181-ge jetti. Bwdan özge auruhandağı eresekterdiñ 900-deyi auır jäne 3118-i orta hälde. Al reanimaciya jäne qarqındı terapiya bölimderinde 132 nauqas bar. 27 adam ÖJJ, 39 nauqas invazivti emes ÖJJ-ımen jäne 61 sırqat High flow apparatımen tınıstap jatır. Sonday-aq, BMSK men Telemedicina ortalığınıñ mobil'di toptarımen birge üy jağdayında 4326 nauqas baqılauda jatır.

Resmi derekke qarağanda, jalpıhalıqtıq vakcinaciyalau nauqanı bastalğalı, yağni aqpan ayınan beri megapoliste 371 mıñ adam ekpeniñ tolıq dozasın alğan. Äkimdik mälimetinşe, äzirge 212 egu punkti men 308 egu brigadasında 1260 medqızmetker jwmıs isteydi.

Osığan deyin, naurız ayında bas sanitar däriger Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatının eskertken.

Almatıda pandemiya kezinde koronavirus pen pnevmoniya sırqattarınıñ qatarı 88 mıñğa (81 mıñı KVI+, 6 mıñı KVI-) juıqtadı. Bekşinniñ aytuınşa, şilde ayında qalada törtinşi tolqın bastaldı.

Bıltır 13 naurızdan beri COVID-19 infekciyasın jwqtırğandar qatarı 477 mıñnan, 1 tamızdan bılayğı koronavirus pnevmoniyası 58 mıñnan asqan. DDSW derekqorı men Wlttıq statistikada Qazaqstanda auırğandar sanı 536 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardan 10 751 adam (KVI+ / U07.1 – 4864, KVI- / U07.2 – 3520, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

"The Qazaq Times"