Ukraina äskerileri de soğısqa dayın. Foto: BBC.

«Ottıñ twtanıp ketuine bir tal siriñke de jetedi». Batıs elderiniñ sarapşıları Resey-EO arasındağı qazirgi qayşılıqtı osılay bağalap otır. Osı aptanıñ basında Europa Odağına müşe elderdiñ SİM jetekşileri jolığıp, Reseydiñ äskeri äreketterin talqıladı. Jiın qorıtındısı boyınşa, odaq üşin qazirgi eñ qauipti mäsele Reseydiñ äskeri äreketteri dep taptı. Osılayşa, Europa Odağı men Resey arasındağı şielenis kün ötken sayın tereñdey tüsti.

EO sırtqı sayasat boyınşa jönindegi ökili Jozef Borrell baspasözge bergen mälimetinde Reseydiñ Ukraina şekarası men Qırımdağı äskerleriniñ sanı 100 mıñnan asqanın aytqan. Biraq, Batıstıñ keybir aqparat qwraldarı Borrelldiñ bwl mälimdemesine kümänmen qaraydı.

Bwğan deyin Qırım men Ukraina şekarasında reseylik 80 mıñ şamasındağı äsker barı aytılıp kelgen. Eki kün bwrın Ukrainanıñ şığıs şekarasına barğan BBC tilşileri de aymaqta kisi qorqarlıq qaqtığıstıñ auanı bayqalmaytının aytqan. Olardıñ habarına qarağanda, bes-altı jıldan beri reseyşil separatistermen qaqtığıs auıq-auıq bolıp twrğan aymaq sol küyinde, tek Resey jaq şekarada äskeri tehnikalardıñ köbeygeni anıq bayqaladı.

Reseydiñ äskeri belsendiligine qarsı ukrain äskerileri de öz dayarlığın jasauda. Reseydiñ şınında şekaradan basıp kiretin-kirmeytini anıq emes, degenmen ukrain äskerleri tabandı qarsılıqqa dayın ekenin bayqatuda.

Täuelsiz sarapşılar da Reseydiñ soğıs bastauğa nietiniñ joq ekenin aytadı. Bar bolğanı Resey özine bağıttalğan qısımdar twsında äskeri aybar körsetip, wpayın asırğısı keledi dep sanaydı. Bwğan qosa Ukraina üşin NATO-nıñ qanşalıqtı qorğauşı bola alatının körsetkisi keletinin añğaruğa boladı.

“The Qazaq Times”