Respublika sarayındağı egu punktine vakcina aluğa kelgen twrğın. 9 säuir 2021 jıl. Almatı qalası. Foto: QT / Kültegin Aspanwlı

Bir ayğa juıq «qızıl aymaqtan» şığa almay jatqan Almatı qalasına koronavirusqa qarsı vakcinanıñ 47 mıñ dozası jetkizilgen, juırda tağı 424 mıñ doza alıp kelinedi dep josparlanğan.

Qalalıq qoğamdıq densaulıq saqtau basqarmasınıñ mälimetinşe, emhanalar men medinalıq ortalıqtarda 189, qoğamdıq özge orındarda (SÜ, SOSO, HQKO, bazarlar – QT) 20 jäne Respublika sarayında egu punkti qwrılğan.

«Osı kezde 18 mıñ jäne 29 mıñ doza mölşerinde vakcinalardıñ 5 jäne 6 tranşı alındı. Aldağı künderi vakcinanıñ 424 mıñ dozasınıñ tağı birneşe partiyasın äkelu josparlanğan», – delingen habarlamada.

Twrğındar emhana kezip, kezekke twrmas üşin ekpe aluğa Egov.kz portalı arqılı aldın ala jazıluğa boladı.

Jergilikti äkimdik ötken täulikte 1180 adam ekpe alğanın aytadı. Jalpıhalıqtıq vakcinaciyalau nauqanı bastalğalı, 1 aqpan men 8 säuir aralığında barlığı 49 160 adam ekpe alğan, onıñ 12,2 mıñı qos birdey dozasın tolıqtay saldırğan.

Immundau şarasınan ötkenderdiñ qwramı: 10 263 medicina qızmetkeri, 8285 pedagog, 5982 qwqıq qorğau qızmetkeri, 307 memlekettik qızmetkeri, sozılmalı auruları bar 4567 adam.

Seysenbi küngi Ükimet otırısında densaulıq saqtau ministri Aleksey Coy Almatı qalasına säuir ayında «Sputnik V» ekpesiniñ 316,8 mıñ, QazCovid-in vakcinasınıñ 3 mıñ, al «basqa öndiruşilerdiñ» 114,9 mıñ dozası keledi dep edi. Alayda jergilikti bilik ökilderi «özge öndiruşilerdiñ» qatarında qay elderdiñ qanday vakcinası barın bilmeydi.

"The Qazaq Times"