Qatañ karantin boyınşa twtınuşınıñ keregin alıp ketuine ne jetkizuge tapsırıs beruine ğana rwqsat etilgen, jwmıs tärtibi şektelgen ashana. Almatı qalası. Naurız 2021 jıl. Foto: QT / Kültegin Aspanwlı

Ükimettiñ lokdaun kezinde qarjılay qoldau körsete almasına közi jetken qala basşılığı qatañdatılğan karantin şekteuin aytarlıqtay jeñildetti. Ashyq pilottıq jobasına qatısatın fitnes ortalıqtar men basseyn-saunalardıñ qızmetine rwqsat etildi.

Qalanıñ bas sanitar-därigeri Jandarbek Bekşin qol qoyğan jaña qaulıda jwmıs künderi sauda üyleri men sauda, oyın-sauıq ortalıqtarınıñ qızmetin tañğı 10.00 men tüngi 22.00 aralığında jürgizuge mümkindik berilgen. Degenmen senbi-jeksenbi künderi jwmıs istemeydi.

Qala «qızıl aymaqqa» engeli (10 naurızdan beri – QT) altınşı märte özgergen qaulıda studentter men oquşılar qaşıqtan bilim aladı delingen. Tek oquşı sanı 300-den aspaytın mektepterdiñ 15 balağa deyingi jinaqtalğan sınıptarı dästürli formatta oqidı. Al basqa bilim oşaqtarında ata-analardıñ ötinişi boyınşa 1-5 (halıqaralıq mektepterde 1-7 aralığındağı) jäne 9 ben 11 (12) sınıptarda oqu procesi 15 oquşığa deyingi kezekşi toptarda oflayn jüredi. Alayda bilim beru wyımdarınıñ eşbirinde ashana jwmıs istemeydi. Tağı bir mañızdı jayt, aluan bağıtta oqıtatın üyirme-kurstar är topta 10 kisige deyin sabaq öte aladı. Biraq bölmede bir adamğa 4 şarşı metrden orın qarastırıluı qajet. Jäne bala-baqşada da sanitarlıq talaptardı saqtay otırıp är topqa 15 balağa deyin qabıldanadı.

Adamdar avtobustardan özge kez kelgen qoğamdıq orında, tipti elge ortaq aşıq jerlerde de (alañqayda sportpen şwğıldanıp jatqan uaqıttan pen 5 jasqa deyingi balalardan tıs jağdayda – QT) betperde tağıp, äleumettik araqaşıqtıq saqtauğa mindetti.

Türli tauar satatın ämbebap jäne azıq-tüliktik aşıq nısandağı barlıq  bazarlar jeksenbiden basqa künderi jwmıs isteydi. Al azıq-auqatqa jatpaytın tauarlar satatın ğimaratta ornalasqan sauda qatarları aptanıñ tek jwmıs künderi aşıq boladı.

Qandayda bir sauda keşenindegi tamaqtanu orındarı auız esigi ortaq dälizden bölek bolğan jağdayda jwmıs künderi qızmetine rwqsat berildi. Kafe-restorannıñ işki sıyımdılığı jalpı orınnıñ jartısınan nemese 30-dan aspauğa tiis. Al aua aynalımı jüyesi rettelgen bolsa, bir mezette 50 orınğa deyin qonaq qabılday aladı. Käsipkerler üşin bir quanar jañalıq, sırtta ne terassada köp degende 50 adam otıradı, esesine apta boyı üzdiksiz isteydi. Qaysıbir ğimaratta jayğasqan fudkordtardan äkelip beru qızmetine tapsırıs beruge ne tek alıp ketuge boladı.

Män berer ereje, endi qala işinde ne mañındağı qoğamdıq kölikter betperde rejimin saqtau tärtibimen demalıs künderi toqtamaydı, tolıq kestemen jüredi. Qala-aymaq arasında qatınaytın ortaq kölikterge äzirge rwqsat joq.

Ashyq pilottıq jobasına engen SPA-fitnes ortalıqtar men basseyn-sauna, köpşilikke arnalğan monşalardıñ qızmeti qayta jandanadı. Osı sanatqa enetin bouling, komp'yuterlik klubtardıñ jwmısı jalğasa beredi.

Teatr, kinoteatr, cirk, koncerttik wyımdar, merekelik ya bwqaralıq şaralar, bil'yard, karaoke, tüngi jäne oyın-loto klubtar, dini ğimarattardıñ qızmetine salınğan tıyım sol qalpı özgermedi.

Qala ömirin qamtamasız etuge arnalğan jäne şwğıl jiındardan basqa bet-bet kezdesudi qajet etetin oflayn otırıs-keñester endi ötpeydi.

Qwjattıñ 30 künde on märte (osı köktemde eñ alğaş 2 naurız №6 qaulı bekitilip edi – QT) özgergenin körgen keybir sarapşı-mamandar jağday twraqsız ekenin yaki äkimdiktiñ däl bügingi jağdayğa dayındığı pısıqtalmağanın körsetedi deydi .

№15 qaulı 3 säuirden bastap küşine enedi.

Qazirge deyin Almatı qalasında dertke şaldıqqandar sanı 40 mıñnan astı. Onıñ 35 193-ine koronavirus jwqqan, tağı 5548 adam pnevmoniyamen auırğan. Osı aptada täuligine 500-den asa nauqas anıqtalıp, 300-den astamı auruhanağa jatqızılıp jatır. Genomdıq zertteu nätijesinde sınamanıñ jartısınan köbinde şeteldik ştamdar tabılğan: britandıq jäne oñtüstikafrikalıq ülgileri. Jwqpalı aurularğa arnalğan mekemelerdegi 5 mıñ orınnıñ 2,8 mıñı bos emes, türli sanattağı sırqattar emdelude.

"The Qazaq Times"