قاتاڭ كارانتين بويىنشا تۇتىنۋشىنىڭ كەرەگىن الىپ كەتۋىنە نە جەتكىزۋگە تاپسىرىس بەرۋىنە عانا رۇقسات ەتىلگەن، جۇمىس ءتارتىبى شەكتەلگەن اسحانا. الماتى قالاسى. ناۋرىز 2021 جىل. فوتو: QT / كۇلتەگىن اسپانۇلى

ۇكىمەتتىڭ لوكداۋن كەزىندە قارجىلاي قولداۋ كورسەتە الماسىنا كوزى جەتكەن قالا باسشىلىعى قاتاڭداتىلعان كارانتين شەكتەۋىن ايتارلىقتاي جەڭىلدەتتى. Ashyq پيلوتتىق جوباسىنا قاتىساتىن فيتنەس ورتالىقتار مەن باسسەين-ساۋنالاردىڭ قىزمەتىنە رۇقسات ەتىلدى.

قالانىڭ باس سانيتار-دارىگەرى جانداربەك بەكشين قول قويعان جاڭا قاۋلىدا جۇمىس كۇندەرى ساۋدا ۇيلەرى مەن ساۋدا، ويىن-ساۋىق ورتالىقتارىنىڭ قىزمەتىن تاڭعى 10.00 مەن تۇنگى 22.00 ارالىعىندا جۇرگىزۋگە مۇمكىندىك بەرىلگەن. دەگەنمەن سەنبى-جەكسەنبى كۇندەرى جۇمىس ىستەمەيدى.

قالا «قىزىل ايماققا» ەنگەلى (10 ناۋرىزدان بەرى – QT) التىنشى مارتە وزگەرگەن قاۋلىدا ستۋدەنتتەر مەن وقۋشىلار قاشىقتان ءبىلىم الادى دەلىنگەن. تەك وقۋشى سانى 300-دەن اسپايتىن مەكتەپتەردىڭ 15 بالاعا دەيىنگى جيناقتالعان سىنىپتارى ءداستۇرلى فورماتتا وقيدى. ال باسقا ءبىلىم وشاقتارىندا اتا-انالاردىڭ ءوتىنىشى بويىنشا 1-5 (حالىقارالىق مەكتەپتەردە 1-7 ارالىعىنداعى) جانە 9 بەن 11 (12) سىنىپتاردا وقۋ پروتسەسى 15 وقۋشىعا دەيىنگى كەزەكشى توپتاردا وفلاين جۇرەدى. الايدا ءبىلىم بەرۋ ۇيىمدارىنىڭ ەشبىرىندە اسحانا جۇمىس ىستەمەيدى. تاعى ءبىر ماڭىزدى جايت، الۋان باعىتتا وقىتاتىن ۇيىرمە-كۋرستار ءار توپتا 10 كىسىگە دەيىن ساباق وتە الادى. بىراق بولمەدە ءبىر ادامعا 4 شارشى مەتردەن ورىن قاراستىرىلۋى قاجەت. جانە بالا-باقشادا دا سانيتارلىق تالاپتاردى ساقتاي وتىرىپ ءار توپقا 15 بالاعا دەيىن قابىلدانادى.

ادامدار اۆتوبۋستاردان وزگە كەز كەلگەن قوعامدىق ورىندا، ءتىپتى ەلگە ورتاق اشىق جەرلەردە دە (الاڭقايدا سپورتپەن شۇعىلدانىپ جاتقان ۋاقىتتان پەن 5 جاسقا دەيىنگى بالالاردان تىس جاعدايدا – QT) بەتپەردە تاعىپ، الەۋمەتتىك اراقاشىقتىق ساقتاۋعا مىندەتتى.

ءتۇرلى تاۋار ساتاتىن امبەباپ جانە ازىق-تۇلىكتىك اشىق نىسانداعى بارلىق  بازارلار جەكسەنبىدەن باسقا كۇندەرى جۇمىس ىستەيدى. ال ازىق-اۋقاتقا جاتپايتىن تاۋارلار ساتاتىن عيماراتتا ورنالاسقان ساۋدا قاتارلارى اپتانىڭ تەك جۇمىس كۇندەرى اشىق بولادى.

قاندايدا ءبىر ساۋدا كەشەنىندەگى تاماقتانۋ ورىندارى اۋىز ەسىگى ورتاق دالىزدەن بولەك بولعان جاعدايدا جۇمىس كۇندەرى قىزمەتىنە رۇقسات بەرىلدى. كافە-رەستوراننىڭ ىشكى سىيىمدىلىعى جالپى ورىننىڭ جارتىسىنان نەمەسە 30-دان اسپاۋعا ءتيىس. ال اۋا اينالىمى جۇيەسى رەتتەلگەن بولسا، ءبىر مەزەتتە 50 ورىنعا دەيىن قوناق قابىلداي الادى. كاسىپكەرلەر ءۇشىن ءبىر قۋانار جاڭالىق، سىرتتا نە تەراسسادا كوپ دەگەندە 50 ادام وتىرادى، ەسەسىنە اپتا بويى ۇزدىكسىز ىستەيدى. قايسىبىر عيماراتتا جايعاسقان فۋدكوردتاردان اكەلىپ بەرۋ قىزمەتىنە تاپسىرىس بەرۋگە نە تەك الىپ كەتۋگە بولادى.

ءمان بەرەر ەرەجە، ەندى قالا ىشىندە نە ماڭىنداعى قوعامدىق كولىكتەر بەتپەردە رەجيمىن ساقتاۋ تارتىبىمەن دەمالىس كۇندەرى توقتامايدى، تولىق كەستەمەن جۇرەدى. قالا-ايماق اراسىندا قاتىنايتىن ورتاق كولىكتەرگە ازىرگە رۇقسات جوق.

Ashyq پيلوتتىق جوباسىنا ەنگەن سپا-فيتنەس ورتالىقتار مەن باسسەين-ساۋنا، كوپشىلىككە ارنالعان مونشالاردىڭ قىزمەتى قايتا جاندانادى. وسى ساناتقا ەنەتىن بوۋلينگ، كومپيۋتەرلىك كلۋبتاردىڭ جۇمىسى جالعاسا بەرەدى.

تەاتر، كينوتەاتر، تسيرك، كونتسەرتتىك ۇيىمدار، مەرەكەلىك يا بۇقارالىق شارالار، بيليارد، كاراوكە، تۇنگى جانە ويىن-لوتو كلۋبتار، ءدىني عيماراتتاردىڭ قىزمەتىنە سالىنعان تىيىم سول قالپى وزگەرمەدى.

قالا ءومىرىن قامتاماسىز ەتۋگە ارنالعان جانە شۇعىل جيىنداردان باسقا بەت-بەت كەزدەسۋدى قاجەت ەتەتىن وفلاين وتىرىس-كەڭەستەر ەندى وتپەيدى.

قۇجاتتىڭ 30 كۇندە ون مارتە (وسى كوكتەمدە ەڭ العاش 2 ناۋرىز №6 قاۋلى بەكىتىلىپ ەدى – QT) وزگەرگەنىن كورگەن كەيبىر ساراپشى-ماماندار جاعداي تۇراقسىز ەكەنىن ياكي اكىمدىكتىڭ ءدال بۇگىنگى جاعدايعا دايىندىعى پىسىقتالماعانىن كورسەتەدى دەيدى .

№15 قاۋلى 3 ساۋىردەن باستاپ كۇشىنە ەنەدى.

قازىرگە دەيىن الماتى قالاسىندا دەرتكە شالدىققاندار سانى 40 مىڭنان استى. ونىڭ 35 193-ىنە كوروناۆيرۋس جۇققان، تاعى 5548 ادام پنەۆمونيامەن اۋىرعان. وسى اپتادا تاۋلىگىنە 500-دەن اسا ناۋقاس انىقتالىپ، 300-دەن استامى اۋرۋحاناعا جاتقىزىلىپ جاتىر. گەنومدىق زەرتتەۋ ناتيجەسىندە سىنامانىڭ جارتىسىنان كوبىندە شەتەلدىك شتامدار تابىلعان: بريتاندىق جانە وڭتۇستىكافريكالىق ۇلگىلەرى. جۇقپالى اۋرۋلارعا ارنالعان مەكەمەلەردەگى 5 مىڭ ورىننىڭ 2,8 مىڭى بوس ەمەس، ءتۇرلى ساناتتاعى سىرقاتتار ەمدەلۋدە.

"The Qazaq Times"