Iran uran bayıtu quatın arttırdı. Foto: VOA.

Iran 2015 jılı jasalğan yadrolıq kelisimdi üşinşi ret bwzdı. Senbi küni osı eldiñ Atom energiyası wyımınıñ ökili mälimdeme jasap, randı ozıq yadrolıq centrifugalarğa jibere bastağanın mälimdedi. Osımen bir uaqıtta Saud Arabiya tarabı Irannıñ tağı bir mwnay tankerin wstağanın habarladı.

Irannıñ uran bayıtu mölşerin arttıruı osı jıl işindegi kelisimdi üşinşi ret bwzuı. Alayda, osıdan bwrın mälimdeme jasağan Iran prezidenti kelisimge qatısqan europalıq elderdiñ kelisimdegi öz mindetin orındamağanın alğa tartıp, Europa elderi (Franciya, Britaniya jäne Germaniya) kelisimdi qorğauğa qadam jasamasa, Irannıñ üşinşi ret kelisimdi bwzatının eskertken bolatın.

Irannıñ bwl eki äreketi batıstıq jäne körşiles arab qarsılastarın alañdattı. Saud Arabiyasınıñ resmi aqparat agenttigi Irannıñ uran bayıtu quatın arttırğanın ayıptay otırıp, Parsı şığanağında törtinşi mwnay tasımal kemesin wstap alğanın sınğa aldı. Sonday-aq, arab aqparat agenttigi Gibraltar mañında wstalğan irandıq mwnay tankeriniñ Süriyadağı Tartus portına toqtağanın ayttı.

Osıdan bwrın Irannıñ atalğan tankeri (Adrian Darya1) AQŞ pen Europanıñ Süriyağa qarsı sankciyasın bwzdı dep ayıptalğan. Gibraltar mañında bwl kemeni Britaniyanıñ teñiz küşteri twtqındağan bolatın. Irannıñ şağımınan keyin AQŞ-tıñ qarsılığına qaramastan Iran kemesi bosatılğan.

Iran prezidenti Hasan Ruhani ötken aptada jasağan mälimdemesinde: «Eger Europa elderi kelisimdegi öz mindetin orndaytın bolsa, Iran kelisimdi saqtaudı qayta jalğastıratın boladı», – dep mälimdegen.

Al, AQŞ qorğanıs ministri Esper senbi küni Parijde ötken baspasöz mäslihatında: «AQŞ Irannıñ bwl qadamına tañqalmaydı. Sebebi, olar osığan deyin de yadrolıq jäne yadrolıq qarulardı taraptau turalı kelisimderdi bwzıp kelgen», – degen pikirin bildirdi.

“The Qazaq Times”