يران يادرولىق كەلىسىمدى ءۇشىنشى رەت بۇزدى

يران 2015 جىلى جاسالعان يادرولىق كەلىسىمدى ءۇشىنشى رەت بۇزدى. سەنبى كۇنى وسى ەلدىڭ اتوم ەنەرگياسى ۇيىمىنىڭ وكىلى مالىمدەمە جاساپ، راندى وزىق يادرولىق تسەنتريفۋگالارعا جىبەرە باستاعانىن مالىمدەدى. وسىمەن ءبىر ۋاقىتتا ساۋد ارابيا تارابى يراننىڭ تاعى ءبىر مۇناي تانكەرىن ۇستاعانىن حابارلادى.

يراننىڭ ۋران بايىتۋ مولشەرىن ارتتىرۋى وسى جىل ىشىندەگى كەلىسىمدى ءۇشىنشى رەت بۇزۋى. الايدا، وسىدان بۇرىن مالىمدەمە جاساعان يران پرەزيدەنتى كەلىسىمگە قاتىسقان ەۋروپالىق ەلدەردىڭ كەلىسىمدەگى ءوز مىندەتىن ورىنداماعانىن العا تارتىپ، ەۋروپا ەلدەرى (فرانتسيا، بريتانيا جانە گەرمانيا) كەلىسىمدى قورعاۋعا قادام جاساماسا، يراننىڭ ءۇشىنشى رەت كەلىسىمدى بۇزاتىنىن ەسكەرتكەن بولاتىن.

يراننىڭ بۇل ەكى ارەكەتى باتىستىق جانە كورشىلەس اراب قارسىلاستارىن الاڭداتتى. ساۋد ارابياسىنىڭ رەسمي اقپارات اگەنتتىگى يراننىڭ ۋران بايىتۋ قۋاتىن ارتتىرعانىن ايىپتاي وتىرىپ، پارسى شىعاناعىندا ءتورتىنشى مۇناي تاسىمال كەمەسىن ۇستاپ العانىن سىنعا الدى. سونداي-اق، اراب اقپارات اگەنتتىگى گيبرالتار ماڭىندا ۇستالعان يراندىق مۇناي تانكەرىنىڭ سۇرياداعى تارتۋس پورتىنا توقتاعانىن ايتتى.

وسىدان بۇرىن يراننىڭ اتالعان تانكەرى (Adrian Darya1) اقش پەن ەۋروپانىڭ سۇرياعا قارسى سانكتسياسىن بۇزدى دەپ ايىپتالعان. گيبرالتار ماڭىندا بۇل كەمەنى بريتانيانىڭ تەڭىز كۇشتەرى تۇتقىنداعان بولاتىن. يراننىڭ شاعىمىنان كەيىن اقش-تىڭ قارسىلىعىنا قاراماستان يران كەمەسى بوساتىلعان.

يران پرەزيدەنتى حاسان رۋحاني وتكەن اپتادا جاساعان مالىمدەمەسىندە: «ەگەر ەۋروپا ەلدەرى كەلىسىمدەگى ءوز مىندەتىن ورندايتىن بولسا، يران كەلىسىمدى ساقتاۋدى قايتا جالعاستىراتىن بولادى»، – دەپ مالىمدەگەن.

ال، اقش قورعانىس ءمينيسترى ەسپەر سەنبى كۇنى پاريجدە وتكەن ءباسپاسوز ءماسليحاتىندا: «اقش يراننىڭ بۇل قادامىنا تاڭقالمايدى. سەبەبى، ولار وسىعان دەيىن دە يادرولىق جانە يادرولىق قارۋلاردى تاراپتاۋ تۋرالى كەلىسىمدەردى بۇزىپ كەلگەن»، – دەگەن پىكىرىن ءبىلدىردى.

“The Qazaq Times”