Photo: newsroom.kz

Pavlodar oblısına moñğoliyalıq qandastarımızdan 13 otbası köşip keldi, dep habarlaydı Düniejüzi qazaqtarı qauımdastığınıñ baspasöz qızmeti.

"Düniejüzi qazaqtarı qauımdastığınıñ Törağası, Qazaqstan Respublikası Twñğış Prezidenti – Elbası Nwrswltan Nazarbaevtıñ şet elde jürgen qandastar tağdırınan bir sätte qol üzbey, tikeley aralasuınıñ negizinde bauırlarımızdıñ tuğan jerine qonıs audaru legi jalğasuda. Düniejüzi qazaqtarınıñ qauımdastığı jäne «Otandastar qorı» KEAQ-nıñ pilottıq jobası ayasında Moñğoliyanıñ Qobda, Bayan-Ölgey aymaqtarınan Qazaqstandağı tuıstarına qosılıp, wrpaqtarın atamekenge jetkizu maqsatında Pavlodar oblısına köp balalı 13 otbasınıñ 80 adamı köşirildi", delingen habarlamada.

Ayta keterligi, Qazaqstanğa birjola köşip keluge niet bildirgen qandastarımız negizinen äleumettik, twrmıstıq jağdayına baylanıstı özdiginen köşip kele almaytın edi. Sondıqtan, bwl igi şara «Otandastar qorı» KEAQ–nıñ qoldauımen Düniejüzi qazaqtarınıñ qauımdastığı Pavlodar oblıstıq filialınıñ wyımdastıruımen iske asırıldı. "Köşip kelgen qandastar arasında 13 balanı ömirge äkelip ösirip, jetkizgen ardaqtı ana Qayşa apamız öziniñ qolındağı kenje wlı men kelininiñ 6 balasımen birge atamekenge kelip otır. Sonday-aq, jasöspirim oqu jasındağı 46 bala, 4 student, 1 zeynetker, eñbek jasındağı 29 azamat köşip keldi. Olardıñ işinde ağılşın tili, bastauış sınıp mwğalimderi, tehnika mamandarı, mehanizator, mal därigeri, medicina salasınıñ mamanı, basqa da arnayı oqu ortalıqtarın bitirgen täjirbieli mamandıq ieleri bar", delingen baspasöz bayanında.

Köşip kelgen otbasıları tügeldey biılğı jılğı oralmandardıñ öñirlik kvotasına enip, memleket tarapınan är adamğa 88 375 teñgeden bir jıl boyı üy jaldap twratın qarajat beriledi. Balaları oqu orındarına, eñbek jasındağılar jwmısqa ornalasadı.

"The Qazaq Times"