پاۆلودار وبلىسىنا موڭعوليالىق قانداستارىمىزدان 13 وتباسى كوشىپ كەلدى، دەپ حابارلايدى دۇنيەجۇزى قازاقتارى قاۋىمداستىعىنىڭ ءباسپاسوز قىزمەتى.

"دۇنيەجۇزى قازاقتارى قاۋىمداستىعىنىڭ توراعاسى، قازاقستان رەسپۋبليكاسى تۇڭعىش پرەزيدەنتى – ەلباسى نۇرسۇلتان نازارباەۆتىڭ شەت ەلدە جۇرگەن قانداستار تاعدىرىنان ءبىر ساتتە قول ۇزبەي، تىكەلەي ارالاسۋىنىڭ نەگىزىندە باۋىرلارىمىزدىڭ تۋعان جەرىنە قونىس اۋدارۋ لەگى جالعاسۋدا. دۇنيەجۇزى قازاقتارىنىڭ قاۋىمداستىعى جانە «وتانداستار قورى» كەاق-نىڭ پيلوتتىق جوباسى اياسىندا موڭعوليانىڭ قوبدا، بايان-ولگەي ايماقتارىنان قازاقستانداعى تۋىستارىنا قوسىلىپ، ۇرپاقتارىن اتامەكەنگە جەتكىزۋ ماقساتىندا پاۆلودار وبلىسىنا كوپ بالالى 13 وتباسىنىڭ 80 ادامى كوشىرىلدى", دەلىنگەن حابارلامادا.

ايتا كەتەرلىگى، قازاقستانعا ءبىرجولا كوشىپ كەلۋگە نيەت بىلدىرگەن قانداستارىمىز نەگىزىنەن الەۋمەتتىك، تۇرمىستىق جاعدايىنا بايلانىستى وزدىگىنەن كوشىپ كەلە المايتىن ەدى. سوندىقتان، بۇل يگى شارا «وتانداستار قورى» كەاق–نىڭ قولداۋىمەن دۇنيەجۇزى قازاقتارىنىڭ قاۋىمداستىعى پاۆلودار وبلىستىق فيليالىنىڭ ۇيىمداستىرۋىمەن ىسكە اسىرىلدى. "كوشىپ كەلگەن قانداستار اراسىندا 13 بالانى ومىرگە اكەلىپ ءوسىرىپ، جەتكىزگەن ارداقتى انا قايشا اپامىز ءوزىنىڭ قولىنداعى كەنجە ۇلى مەن كەلىنىنىڭ 6 بالاسىمەن بىرگە اتامەكەنگە كەلىپ وتىر. سونداي-اق، ءجاسوسپىرىم وقۋ جاسىنداعى 46 بالا، 4 ستۋدەنت، 1 زەينەتكەر، ەڭبەك جاسىنداعى 29 ازامات كوشىپ كەلدى. ولاردىڭ ىشىندە اعىلشىن ءتىلى، باستاۋىش سىنىپ مۇعالىمدەرى، تەحنيكا ماماندارى، مەحانيزاتور، مال دارىگەرى، مەديتسينا سالاسىنىڭ مامانى، باسقا دا ارنايى وقۋ ورتالىقتارىن بىتىرگەن تاجىربيەلى ماماندىق يەلەرى بار", دەلىنگەن ءباسپاسوز بايانىندا.

كوشىپ كەلگەن وتباسىلارى تۇگەلدەي بيىلعى جىلعى ورالمانداردىڭ وڭىرلىك كۆوتاسىنا ەنىپ، مەملەكەت تاراپىنان ءار ادامعا 88 375 تەڭگەدەن ءبىر جىل بويى ءۇي جالداپ تۇراتىن قاراجات بەرىلەدى. بالالارى وقۋ ورىندارىنا، ەڭبەك جاسىنداعىلار جۇمىسقا ورنالاسادى.

"The Qazaq Times"