AQŞtıñ bwrınğı qorğanıs ministri Eşton Karter. Foto: Washington Times.

AQŞ-tıñ bwrınğı qorğanıs ministri Eşton Karter Qwrama Ştattar men aziyalıq odaqtastarın Qıtaydıñ aymaqtağı keñeyuine qarsı birlikte küresuge şaqırdı. Ol bwnday pikirdi Garvardtağı Kennedi institutınıñ qoğamdıq-sayasi basılımında jariyalanğan maqalasında ortağa salğan.

Karter atalğan maqalasında: «Tayuan (Tayvan') bwğazı, Korey tübegi, Tınıq mwhit aymağı jäne jahandıq sauda sekildi köptegen mäselelerde Qıtay biligi toleranttılıqtan köri integraciyanı, tüsinisuge tırısudan köri qarsılasudı maqsat etti», – degen.

Ol Qıtaydıñ keñeyuine jol bermeu üşin Qwrama Ştattarğa innovaciyalıq investiciyalardı wlğaytuğa keñes beredi. «Biz sonday-aq, Japoniya, Oñtüstik Koreya jäne Avstraliya sekildi bayırğı odaqtastarmen jäne V'etnam men Ündistan siyaqtı jaña seriktestermen küşti äskeri äriptestik baylanıstar ornatudı jalğastıruımız kerek», – deydi Karter.

Eşton Karter  2017 jılı qañtarda AQŞ Qorğanıs ministrliginiñ basşılığınan ketken bolatın. Qazirgi uaqıtta Garvardtıñ Kennedi atındağı instituttıñ direktorı.

Karterdiñ aytqanındağıday  Qıtay biligi Tayuan bwğazındağı, Oñtüstik Qıtay teñizindegi, Tınıq mwhittağı territoriyalıq daular nemese özgede mäseleler, sauda qayşılığınıñ bärinde tüsinistik arqılı şeşuden köri qarsılıq şaraların basım qoldanatının bayqattı. Soñğı birneşe ayda AQŞ pen Qıtaydıñ qarım-qatınası qayşılıqtarğa wlastı. Qıtaydıñ Şığıs, Oñtüstik Şığıs Aziyadağı qalamdarı Uaşington tarabınan jii ayıptau men sınğa wşıradı.

“The Qazaq Times”