اقش-تىڭ بۇرىنعى قورعانىس ءمينيسترى ەشتون كارتەر قۇراما شتاتتار مەن ازيالىق وداقتاستارىن قىتايدىڭ ايماقتاعى كەڭەيۋىنە قارسى بىرلىكتە كۇرەسۋگە شاقىردى. ول بۇنداي پىكىردى گارۆاردتاعى كەننەدي ينستيتۋتىنىڭ قوعامدىق-ساياسي باسىلىمىندا جاريالانعان ماقالاسىندا ورتاعا سالعان.

كارتەر اتالعان ماقالاسىندا: «تايۋان (تايۆان) بۇعازى، كورەي تۇبەگى، تىنىق مۇحيت ايماعى جانە جاھاندىق ساۋدا سەكىلدى كوپتەگەن ماسەلەلەردە قىتاي بيلىگى تولەرانتتىلىقتان كورى ينتەگراتسيانى، تۇسىنىسۋگە تىرىسۋدان كورى قارسىلاسۋدى ماقسات ەتتى»، – دەگەن.

ول قىتايدىڭ كەڭەيۋىنە جول بەرمەۋ ءۇشىن قۇراما شتاتتارعا يننوۆاتسيالىق ينۆەستيتسيالاردى ۇلعايتۋعا كەڭەس بەرەدى. «ءبىز سونداي-اق، جاپونيا، وڭتۇستىك كورەيا جانە اۆستراليا سەكىلدى بايىرعى وداقتاستارمەن جانە ۆەتنام مەن ءۇندىستان سياقتى جاڭا سەرىكتەستەرمەن كۇشتى اسكەري ارىپتەستىك بايلانىستار ورناتۋدى جالعاستىرۋىمىز كەرەك»، – دەيدى كارتەر.

ەشتون كارتەر  2017 جىلى قاڭتاردا اقش قورعانىس مينيسترلىگىنىڭ باسشىلىعىنان كەتكەن بولاتىن. قازىرگى ۋاقىتتا گارۆاردتىڭ كەننەدي اتىنداعى ينستيتۋتتىڭ ديرەكتورى.

كارتەردىڭ ايتقانىنداعىداي  قىتاي بيلىگى تايۋان بۇعازىنداعى، وڭتۇستىك قىتاي تەڭىزىندەگى، تىنىق مۇحيتتاعى تەرريتوريالىق داۋلار نەمەسە وزگەدە ماسەلەلەر، ساۋدا قايشىلىعىنىڭ بارىندە تۇسىنىستىك ارقىلى شەشۋدەن كورى قارسىلىق شارالارىن باسىم قولداناتىنىن بايقاتتى. سوڭعى بىرنەشە ايدا اقش پەن قىتايدىڭ قارىم-قاتىناسى قايشىلىقتارعا ۇلاستى. قىتايدىڭ شىعىس، وڭتۇستىك شىعىس ازياداعى قالامدارى ۋاشينگتون تارابىنان ءجيى ايىپتاۋ مەن سىنعا ۇشىرادى.

“The Qazaq Times”