Foto: businessht.bloomberght.com

IIR-nıñ (Iran Islam Respublikası) Sırtqı ister ministri Mwhammed Djavad Zarif eger Europa odağınıñ «Ortaq qadam» jan-jaqtı bağdarlamasın saqtap qalu üşin wsınğan mehanizmi paydağa aspasa, Irannıñ atalğan kelisimşarttan şığatının mälimdedi. Bwl turalı lanouvellerepublique.fr habarlaydı. 

M.D.Zarif senbi küni IIR-nıñ N'yu-Yorktegi ökildiginde tilşilerdiñ swrağına jauap bere kele, Irannıñ «Ortaq qadam» jan-jaqtı bağdarlamasına qatıstı wstanımına toqtalıp: «Eger europalıqtar atalğan bağdarlamanıñ odan ärgi implementaciyasına kepil bolatınday tiimdi mehanizmdı jüzege asıra almasa, onda Iran kelisimşarttan şığadı», - dedi.

Eske salayıq, AQŞ osı atalğan kelisimşarttan birjaqtı şeşimmen şıqqannan keyin Europa elderi oğan Iranmen aradağı sauda kelisimşartınıñ tölemderin jeñildetetin qarjı täsimin wsınğan edi. Osı arqılı eñ aldımen, europalıq käsiporındardıñ Iranmen özara sauda-ekonomikalıq äreketterin jalğastırularına mümkindik berudi közdegen edi. Sonımen qatar, Iran SİM basşısı Irannıñ «Ortaq qadam» jan-jaqtı bağdarlamadan şığuı Iranğa jasalatın äskeri şabuılğa jol aşuı mümkin be degen swraqqa: «Eger amerikalıqtar Iranğa şabuıl jasağannan birdeñe wtamız dep oylasa, baqtarın sınap körsin», - dep jauap bergen.  AQŞ prezidenti Donal'd Tramp Irannıñ yadrolıq bağdarlamasınan («Ortaq qadam» jan-jaqtı bağdarlaması) şığatının jariyalağannan keyin Iranğa qısımın küşeytip, özge elderdi irandıq mwnaydı satıp almauğa şaqırğan edi. Alayda, EO elderi  Irannıñ atalğan bağdarlamanıñ şarttarın jüzege asırıp otırğandığın aytıp, kerisinşe oğan salınğan sankciyalardı jeñildetudi talap etken bolatın. Sonımen qatar, Zarif aytqan mehanizm turalı ayta keter bolsaq, ötken aptada Irannıñ yadrolıq mäselesine qatıstı «Ortaq qadam» jan-jaqtı bağdarlaması»  kelisimşartına qol qoyuşı elder AQŞ-tıñ odan şığuına baylanıstı Iran eksportınıñ tölemderin jeñildetu üşin jaña mehanizm qwru nietinde ekenin jariyalağan edi. 

“The Qazaq Times”