يران دا اقش-تىڭ ارتىنان يادرولىق كەلىسىمشارتتان شىعۋى مۇمكىن

ير-نىڭ (يران يسلام رەسپۋبليكاسى) سىرتقى ىستەر ءمينيسترى مۇحاممەد دجاۆاد زاريف ەگەر ەۋروپا وداعىنىڭ «ورتاق قادام» جان-جاقتى باعدارلاماسىن ساقتاپ قالۋ ءۇشىن ۇسىنعان مەحانيزمى پايداعا اسپاسا، يراننىڭ اتالعان كەلىسىمشارتتان شىعاتىنىن مالىمدەدى. بۇل تۋرالى lanouvellerepublique.fr حابارلايدى. 

م.د.زاريف سەنبى كۇنى ير-نىڭ نيۋ-يوركتەگى وكىلدىگىندە تىلشىلەردىڭ سۇراعىنا جاۋاپ بەرە كەلە، يراننىڭ «ورتاق قادام» جان-جاقتى باعدارلاماسىنا قاتىستى ۇستانىمىنا توقتالىپ: «ەگەر ەۋروپالىقتار اتالعان باعدارلامانىڭ ودان ارگى يمپلەمەنتاتسياسىنا كەپىل بولاتىنداي ءتيىمدى مەحانيزمدى جۇزەگە اسىرا الماسا، وندا يران كەلىسىمشارتتان شىعادى»، - دەدى.

ەسكە سالايىق، اقش وسى اتالعان كەلىسىمشارتتان بىرجاقتى شەشىممەن شىققاننان كەيىن ەۋروپا ەلدەرى وعان يرانمەن اراداعى ساۋدا كەلىسىمشارتىنىڭ تولەمدەرىن جەڭىلدەتەتىن قارجى ءتاسىمىن ۇسىنعان ەدى. وسى ارقىلى ەڭ الدىمەن، ەۋروپالىق كاسىپورىنداردىڭ يرانمەن ءوزارا ساۋدا-ەكونوميكالىق ارەكەتتەرىن جالعاستىرۋلارىنا مۇمكىندىك بەرۋدى كوزدەگەن ەدى. سونىمەن قاتار، يران ءسىم باسشىسى يراننىڭ «ورتاق قادام» جان-جاقتى باعدارلامادان شىعۋى يرانعا جاسالاتىن اسكەري شابۋىلعا جول اشۋى مۇمكىن بە دەگەن سۇراققا: «ەگەر امەريكالىقتار يرانعا شابۋىل جاساعاننان بىردەڭە ۇتامىز دەپ ويلاسا، باقتارىن سىناپ كورسىن»، - دەپ جاۋاپ بەرگەن.  اقش پرەزيدەنتى دونالد ترامپ يراننىڭ يادرولىق باعدارلاماسىنان («ورتاق قادام» جان-جاقتى باعدارلاماسى) شىعاتىنىن جاريالاعاننان كەيىن يرانعا قىسىمىن كۇشەيتىپ، وزگە ەلدەردى يراندىق مۇنايدى ساتىپ الماۋعا شاقىرعان ەدى. الايدا، ەو ەلدەرى  يراننىڭ اتالعان باعدارلامانىڭ شارتتارىن جۇزەگە اسىرىپ وتىرعاندىعىن ايتىپ، كەرىسىنشە وعان سالىنعان سانكتسيالاردى جەڭىلدەتۋدى تالاپ ەتكەن بولاتىن. سونىمەن قاتار، زاريف ايتقان مەحانيزم تۋرالى ايتا كەتەر بولساق، وتكەن اپتادا يراننىڭ يادرولىق ماسەلەسىنە قاتىستى «ورتاق قادام» جان-جاقتى باعدارلاماسى»  كەلىسىمشارتىنا قول قويۋشى ەلدەر اقش-تىڭ ودان شىعۋىنا بايلانىستى يران ەكسپورتىنىڭ تولەمدەرىن جەڭىلدەتۋ ءۇشىن جاڭا مەحانيزم قۇرۋ نيەتىندە ەكەنىن جاريالاعان ەدى. 

“The Qazaq Times”