Prezident Hasan Ruhani Irannıñ Ahvaz qalasında orın alğan teraktiden keyin AQŞ-qa qarsı mälimdeme jasadı, - dep habarlaydı Bi-bi-si.

Ruhani atalğan teraktige AQŞ pen onıñ qoldauına ie Parsı şığanağı elderin kinälaydı. Iran lideri Islam memleketiniñ mwnday qılmıstarğa «odan äri şıday almaytının» mälimdedi. «Bwl qılmıstı kimniñ wyımdastırğanı bizge aydan anıq. Äri onıñ kimdermen baylanısı bar ekeni de tüsinikti», - degen Ruhani. Onıñ aytuınşa, Parsı şığanağı elderiniñ biri osı  teraktini orındauşığa «qaru-jaraqpen jäne qarjılıq-sayasi twrğıdan» qoldau körsetken. «Aymaqtıñ (Parsı şığanağı) quırşaq memleketterine AQŞ qoldau körsetedi. Amerika olardı arandatqanımen qoymay, qajetti kömektermen qamtamasız etedi. AQŞ älemge öziniñ bwzaqılıq bolmısın körsetip, birjaqtı sayasatın jalğastıruda», - dedi Ruhani.

Iran prezidenti «quırşaq elder» degenimen, naqtı qay elder ekenin anıq aytpadı. Degenmen, onıñ sözinen Irannıñ aymaqtıñ qarsılastarın, atap aytar bolsaq, — Saud Arabiyası, BAÄ jäne Bahreyn elderin meñzegenin tüsinuge boladı deydi sarapşılar.

Jeksenbi, 23 qızküyekte Irannıñ Sırtqı ister ministri osı teraktige qatıstı jasalğan «birjaqtı mälimdemesine» qarsı qarsılıq retinde BAÄ tarapın şaqırğan bolatın.

Eske salayıq, 22 qırküyek, senbi küni belgisiz bireuler Irannıñ Ahvaz qalasında ötken äskeri şerude oq atqan edi. Keyin köp wzamay, talğan şabuıldı tört adam jasağanı belgili boldı. Olardıñ ekeui oqqa wşıp, qalğan ekeui qamauğa alınğan. Osı atalğan terakt saldarınan 12 äsker men şeruge kelgen beybit twrğındardı qosqanda, barlığı 25 adam qaza tapqan. Keyin, teraktini DAIŞ terrorlıq wyımı öz moyındarına alğanmen, Iran biligi bwl aqparattı joqqa şığaruda.

“The Qazaq Times”