پرەزيدەنت حاسان رۋحاني يراننىڭ احۆاز قالاسىندا ورىن العان تەراكتىدەن كەيىن اقش-قا قارسى مالىمدەمە جاسادى، - دەپ حابارلايدى بي-بي-سي.

رۋحاني اتالعان تەراكتىگە اقش پەن ونىڭ قولداۋىنا يە پارسى شىعاناعى ەلدەرىن كىنالايدى. يران ليدەرى يسلام مەملەكەتىنىڭ مۇنداي قىلمىستارعا «ودان ءارى شىداي المايتىنىن» مالىمدەدى. «بۇل قىلمىستى كىمنىڭ ۇيىمداستىرعانى بىزگە ايدان انىق. ءارى ونىڭ كىمدەرمەن بايلانىسى بار ەكەنى دە تۇسىنىكتى»، - دەگەن رۋحاني. ونىڭ ايتۋىنشا، پارسى شىعاناعى ەلدەرىنىڭ ءبىرى وسى  تەراكتىنى ورىنداۋشىعا «قارۋ-جاراقپەن جانە قارجىلىق-ساياسي تۇرعىدان» قولداۋ كورسەتكەن. «ايماقتىڭ (پارسى شىعاناعى) قۋىرشاق مەملەكەتتەرىنە اقش قولداۋ كورسەتەدى. امەريكا ولاردى ارانداتقانىمەن قويماي، قاجەتتى كومەكتەرمەن قامتاماسىز ەتەدى. اقش الەمگە ءوزىنىڭ بۇزاقىلىق بولمىسىن كورسەتىپ، بىرجاقتى ساياساتىن جالعاستىرۋدا»، - دەدى رۋحاني.

يران پرەزيدەنتى «قۋىرشاق ەلدەر» دەگەنىمەن، ناقتى قاي ەلدەر ەكەنىن انىق ايتپادى. دەگەنمەن، ونىڭ سوزىنەن يراننىڭ ايماقتىڭ قارسىلاستارىن، اتاپ ايتار بولساق، — ساۋد ارابياسى، ءباا جانە باحرەين ەلدەرىن مەڭزەگەنىن تۇسىنۋگە بولادى دەيدى ساراپشىلار.

جەكسەنبى، 23 قىزكۇيەكتە يراننىڭ سىرتقى ىستەر ءمينيسترى وسى تەراكتىگە قاتىستى جاسالعان «بىرجاقتى مالىمدەمەسىنە» قارسى قارسىلىق رەتىندە ءباا تاراپىن شاقىرعان بولاتىن.

ەسكە سالايىق، 22 قىركۇيەك، سەنبى كۇنى بەلگىسىز بىرەۋلەر يراننىڭ احۆاز قالاسىندا وتكەن اسكەري شەرۋدە وق اتقان ەدى. كەيىن كوپ ۇزاماي، تالعان شابۋىلدى ءتورت ادام جاساعانى بەلگىلى بولدى. ولاردىڭ ەكەۋى وققا ۇشىپ، قالعان ەكەۋى قاماۋعا الىنعان. وسى اتالعان تەراكت سالدارىنان 12 اسكەر مەن شەرۋگە كەلگەن بەيبىت تۇرعىنداردى قوسقاندا، بارلىعى 25 ادام قازا تاپقان. كەيىن، تەراكتىنى دايش تەررورلىق ۇيىمى ءوز مويىندارىنا العانمەن، يران بيلىگى بۇل اقپاراتتى جوققا شىعارۋدا.

“The Qazaq Times”