Tramp kelissözden bas tartqanın hat arqılı bildirgen. Foto: Medium,

AQŞ prezidenti Soltüstik Koreya basşısımen kezdesuden bas tartqanımen, KHDR basşısı Kim Joñ Un qaytara mälimdeme jasap: «Tramppen kelissöz ötkizuge ärqaşan dayınmın», – dedi. Bwğan qosa sol eldiñ Sırtqı ister ministriniñ orınbasarı da öz sözinde: «Tramptıñ bwl şeşimi tım ökinişti», – degen közqarasın jetkizdi. Soltüstik Koreya tarabınıñ bwl resmi mälimdemesin sol eldiñ resmi aqparat qwraldarı jäne Oñtüstik Koreyanıñ Yonhap agenttigi tarattı.

Kelissözdiñ küşinen qaldırıluına Tramptıñ körsetken sebebi – Soltüstik Koreya şınayı niette emes, astırtın äreketterge bardı. Alayda, Tramptıñ Wlttıq qauipsizdik jönindegi keñesşisi Jon Bolton aqparat qwraldarına: «Soltüstik Koreyanıñ yadrolıq qarudı joyu isi «Liviyanıñ scenariyımen» jürui kerek», – degen pikirin jetkizgen. Oğan qosa AQŞ vice-prezidenti de osığan wqsas közqaras bildirdi. AQŞ lauazımdılarınıñ bwl pikiri Pioñyañ biligin renjitti.

Al, BBC-diñ habarına qarağanda, Tramp kelissözden bas tartqanın, Kim Joñ Unğa joldağan hatı arqılı bildirgen. Tramp hatında, «kezdesudi asığa kütkenin», alayda soñğı jağdaylar «üreydi wşırğan ökiniş jäne aşıq qastandıq» köpten beri josparlanğan kelissözdi «qajetsiz dep eseptegenin» aytqan.

Aq üy lauazımdılarınıñ aytuınşa, Tramp hattıñ «ütir, nüktesine deyin» özi jazğan. Tramp bwl şeşimdi Oñtüstik Koreyanıñ prezidenti Mün Jaynmen kezdeskennen keyin qabıldağanı da mälim.

Degenmen, prezident Tramp hat soñında «Bir küni jolığarmız» degen sözdi de kiristirgen. Aytalıq, Kim Joñ Un közqarasın özgertip, kelissözder üşin jaña uaqıt belgilep jatsa qarsı emes ekenin, telefon arqılı söylesip, nemese hat arqılı baylanıs ornatuğa dayın ekenin de aytqan.

“The Qazaq Times”