ترامپ سولتۇستىك كورەيا باسشىسىنا جازعان حاتىندا نە ايتتى؟

اقش پرەزيدەنتى سولتۇستىك كورەيا باسشىسىمەن كەزدەسۋدەن باس تارتقانىمەن، كحدر باسشىسى كيم جوڭ ۋن قايتارا مالىمدەمە جاساپ: «ترامپپەن كەلىسسوز وتكىزۋگە ارقاشان دايىنمىن»، – دەدى. بۇعان قوسا سول ەلدىڭ سىرتقى ىستەر ءمينيسترىنىڭ ورىنباسارى دا ءوز سوزىندە: «ترامپتىڭ بۇل شەشىمى تىم وكىنىشتى»، – دەگەن كوزقاراسىن جەتكىزدى. سولتۇستىك كورەيا تارابىنىڭ بۇل رەسمي مالىمدەمەسىن سول ەلدىڭ رەسمي اقپارات قۇرالدارى جانە وڭتۇستىك كورەيانىڭ Yonhap اگەنتتىگى تاراتتى.

كەلىسسوزدىڭ كۇشىنەن قالدىرىلۋىنا ترامپتىڭ كورسەتكەن سەبەبى – سولتۇستىك كورەيا شىنايى نيەتتە ەمەس، استىرتىن ارەكەتتەرگە باردى. الايدا، ترامپتىڭ ۇلتتىق قاۋىپسىزدىك جونىندەگى كەڭەسشىسى جون بولتون اقپارات قۇرالدارىنا: «سولتۇستىك كورەيانىڭ يادرولىق قارۋدى جويۋ ءىسى «ليۆيانىڭ ستسەناريىمەن» ءجۇرۋى كەرەك»، – دەگەن پىكىرىن جەتكىزگەن. وعان قوسا اقش ۆيتسە-پرەزيدەنتى دە وسىعان ۇقساس كوزقاراس ءبىلدىردى. اقش لاۋازىمدىلارىنىڭ بۇل پىكىرى پيوڭياڭ بيلىگىن رەنجىتتى.

ال، BBC-ءدىڭ حابارىنا قاراعاندا، ترامپ كەلىسسوزدەن باس تارتقانىن، كيم جوڭ ۋنعا جولداعان حاتى ارقىلى بىلدىرگەن. ترامپ حاتىندا، «كەزدەسۋدى اسىعا كۇتكەنىن»، الايدا سوڭعى جاعدايلار «ۇرەيدى ۇشىرعان وكىنىش جانە اشىق قاستاندىق» كوپتەن بەرى جوسپارلانعان كەلىسسوزدى «قاجەتسىز دەپ ەسەپتەگەنىن» ايتقان.

اق ءۇي لاۋازىمدىلارىنىڭ ايتۋىنشا، ترامپ حاتتىڭ «ءۇتىر، نۇكتەسىنە دەيىن» ءوزى جازعان. ترامپ بۇل شەشىمدى وڭتۇستىك كورەيانىڭ پرەزيدەنتى ءمۇن جاينمەن كەزدەسكەننەن كەيىن قابىلداعانى دا ءمالىم.

دەگەنمەن، پرەزيدەنت ترامپ حات سوڭىندا «ءبىر كۇنى جولىعارمىز» دەگەن ءسوزدى دە كىرىستىرگەن. ايتالىق، كيم جوڭ ۋن كوزقاراسىن وزگەرتىپ، كەلىسسوزدەر ءۇشىن جاڭا ۋاقىت بەلگىلەپ جاتسا قارسى ەمەس ەكەنىن، تەلەفون ارقىلى سويلەسىپ، نەمەسە حات ارقىلى بايلانىس ورناتۋعا دايىن ەكەنىن دە ايتقان.

“The Qazaq Times”