Foto: minval.az Surette - Iraktıñ Prem'er-ministri Hayder äl-Abadi.

Iraktıñ Joğarğı Sotı täuelsizdik aludı közdegen Kürdistan avtonomiyasına qatıstı öz ükimin şığardı. Onıñ şeşiminde Irak Konstituciyasına säykes, memleket qwramına kiretin kez kelgen öñirdiñ ortalıq ükimetten bölinuine tıyım salınatındığı aytılğan. Qwjatta "Iraktıñ twtastığın qoldaytın Sot ükimi qayta qarauğa ne özgertuge jatpaydı", -delingen. Bwl turalı Äl-Jazira aqparattıq agenttigi jazdı. 

Iraktıñ Prem'er-ministri Hayder äl-Abadi barlıq taraptardı Sot şeşimin qatañ saqtauğa şaqırdı.  25 qırküyek küni referendum ötkizip, Iraktan irgesin aulaq saludı maqsat twtqan Kürdistan avtonomiyası nebäri 1 aydıñ işinde özi ielenip otırğan territoriyanıñ  40 payızın joğalttı. 2014 jılı irak äskeri "Islam memleketi" lañkestik wyımınıñ küşterinen şeginip, terrorşılar qolında qaldırıp ketken mwnayğa bay Kirkuk qalasın bosatıp alğan kürdter referendumğa baylanıstı daudan keyin atalğan şahardan tağı da qol üzip qaldı. Irak äskeri az künniñ işinde küşpen köp aumaqtı öziniñ qol astına qaytarıp aldı.

Referendumğa qatısqan halıqtıñ 92 payızı täuelsizdikti qoldap dauıs bergenimen, Ortalıq ükimetpen ortaq kelisimge kele almau jäne şet memleketterdiñ "Bwl jağday Iraktıñ "Islam memleketi" lañkestik wyımına qarsı küresine zardabın tigizedi" degen qısımınan keyin Kürdistan avtonomiyasınıñ qadamdarı bäseñdep qaldı.

Kürdistannıñ öñirlik ükimeti 2018 jılğa arnalğan byudjette aymaqqa bölinetin qarjınıñ qısqarğanına narazılıq tanıtıp, Ortalıq Ükimetke arız joldadı. Osığan deyin Irak  Konstituciyanıñ 3 bölim, 121-babın bwzğanı üşin Kürdistannıñ keler jılğa arnalğan byudjetin 17 payızdan 12,6 payızğa deyin qısqartu turalı şeşim qabıldağan bolatın. Bwl - Kürdistannıñ memleketten bölinu turalı ideyası üşin alğan jazası bolmaq.

“The Qazaq Times”