![](https://qazaqtimes.com/kk/content/uploads/2017/11/01-1-800x480.jpg?token=9f88663a89372f09a39239f5436f9681)
Reseyde osı jeksenbi küni ötken Vladimir Putinge qarsı şeruge qatısqan 400 adam twtqındalğan. Olar qala köşelerindegi narazılıq şarasına Vyaçeslav Mal'cevtıñ ğalamtordağı "Putinniñ tiraniyasına qarsı revolyuciya" wyımdastıru turalı radikaldı ündeuinen keyin şıqqan. OVD-Info mälimetinşe, jalpı 412 adam (376 - Mäskeu, 13-Sankt-Peterburg) qolğa tüsken. Bwl turalı APF aqparattıq agenttigi jazdı.
Mäskeu policiyası 263 adamdı qwrıqtağanın habarladı. TASS aqparattıq agenttiginiñ dereginşe, şeru qatısuşılarınıñ qolında pışaqtar men rezeñke oq atatın tapanşalar bolğan. APF aqparattıq agenttiginiñ fotografı oqtan qorğaytın keudeşeler kigen policiya qızmetkerleri belsendilerdi birinen-soñ birin Kreml'ge jaqın mañdağı alañnan wstap alıp ketken.
Jeksenbi küni sonday-aq "Ülken teatr" mañına bomba qoyılğanı turalı aqparatpen este qaldı. Bwl mañnan 10 mıñğa juıq adam evakuaciyalandı. Degenmen aqparattıñ rastalğanı jöninde derek joq.
Vyaçeslav Mal'cev özin "orıs wltşılı" dep ataytın qoğam belsendisi. Ol ötken jılı Parlamentke saylanu üşin bäsekege tüsken. Osı jıldıñ basında Parijge qonıs audardı. Mäskeu Sotı onı qoğamdı ekstremistik is-äreketterge şaqırğanı üşin ayıptap, twtqındau turalı bwyrıq şığardı.
Onıñ basşılığımen qwrılğan «Artpodgotovka» wyımına Reseyde äskeri qimıldardı meñzeytin atauı üşin tıyım salınıp, onıñ müşeleri 4-5 qaraşada "jarılıs wyımdastırmaq bolğan" degen küdikpen wstalğan bolatın.
Resey Prezidentine qarsı atışulı şerulerdi osığan deyin Aleksey Naval'nıy wyımdastırıp edi. 2018 jılğı Prezident saylauına ümitker twlğanıñ şeruleri de policiyanıñ qatısuımen jäne birneşe jüzdegen adamdardıñ twtqındaluımen ayaqtalğan.