رەسەيدە پۋتينگە قارسى شەرۋگە قاتىسقاندار تۇتقىندالدى

رەسەيدە وسى جەكسەنبى كۇنى وتكەن ۆلاديمير پۋتينگە قارسى شەرۋگە قاتىسقان 400 ادام تۇتقىندالعان. ولار قالا كوشەلەرىندەگى نارازىلىق شاراسىنا ۆياچەسلاۆ مالتسەۆتىڭ عالامتورداعى ء"پۋتيننىڭ تيرانياسىنا قارسى رەۆوليۋتسيا" ۇيىمداستىرۋ تۋرالى راديكالدى ۇندەۋىنەن كەيىن شىققان. OVD-Info مالىمەتىنشە، جالپى 412 ادام (376 - ماسكەۋ، 13-سانكت-پەتەربۋرگ) قولعا تۇسكەن. بۇل تۋرالى APF اقپاراتتىق اگەنتتىگى جازدى. 

ماسكەۋ پوليتسياسى 263 ادامدى قۇرىقتاعانىن حابارلادى. TASS اقپاراتتىق اگەنتتىگىنىڭ دەرەگىنشە، شەرۋ قاتىسۋشىلارىنىڭ قولىندا پىشاقتار مەن رەزەڭكە وق اتاتىن تاپانشالار بولعان. APF اقپاراتتىق اگەنتتىگىنىڭ فوتوگرافى وقتان قورعايتىن كەۋدەشەلەر كيگەن پوليتسيا قىزمەتكەرلەرى بەلسەندىلەردى بىرىنەن-سوڭ ءبىرىن كرەملگە جاقىن ماڭداعى الاڭنان ۇستاپ الىپ كەتكەن.

جەكسەنبى كۇنى سونداي-اق "ۇلكەن تەاتر" ماڭىنا بومبا قويىلعانى تۋرالى اقپاراتپەن ەستە قالدى. بۇل ماڭنان 10 مىڭعا جۋىق ادام ەۆاكۋاتسيالاندى. دەگەنمەن اقپاراتتىڭ راستالعانى جونىندە دەرەك جوق.

ۆياچەسلاۆ مالتسەۆ ءوزىن "ورىس ۇلتشىلى" دەپ اتايتىن قوعام بەلسەندىسى. ول وتكەن جىلى پارلامەنتكە سايلانۋ ءۇشىن باسەكەگە تۇسكەن. وسى جىلدىڭ باسىندا پاريجگە قونىس اۋداردى. ماسكەۋ سوتى ونى قوعامدى ەكسترەميستىك ءىس-ارەكەتتەرگە شاقىرعانى ءۇشىن ايىپتاپ، تۇتقىنداۋ تۋرالى بۇيرىق شىعاردى.

ونىڭ باسشىلىعىمەن قۇرىلعان «ارتپودگوتوۆكا» ۇيىمىنا رەسەيدە اسكەري قيمىلداردى مەڭزەيتىن اتاۋى ءۇشىن تىيىم سالىنىپ، ونىڭ مۇشەلەرى 4-5 قاراشادا "جارىلىس ۇيىمداستىرماق بولعان" دەگەن كۇدىكپەن ۇستالعان بولاتىن.

رەسەي پرەزيدەنتىنە قارسى اتىشۋلى شەرۋلەردى وسىعان دەيىن الەكسەي ناۆالنىي ۇيىمداستىرىپ ەدى. 2018 جىلعى پرەزيدەنت سايلاۋىنا ۇمىتكەر تۇلعانىڭ شەرۋلەرى دە پوليتسيانىڭ قاتىسۋىمەن جانە بىرنەشە جۇزدەگەن ادامداردىڭ تۇتقىندالۋىمەن اياقتالعان.

“The Qazaq Times”