Foto: bbc.com

Venesuela Prezidenti Nikolas Maduro memleket öziniñ sırtqı qarızdarın öteuge qabiletsiz ekendigin habarladı. Memlekettik arnadan söylegen sözinde el Prezidenti investorlarmen sırtqı qarızdı töleu uaqıtın şegeru nemese onıñ kölemin azaytu boyınşa kelisimderge keluge tırısatının jetkizdi. Bwl turalı CNN Money jazdı.

PDVSA memlekettik mwnay kompaniyası osı aptada öz qarızdarınıñ 1,1 mlrd dolların qaytardı. Venesuelanıñ Wlttıq bankinde qalğan qarjı kölemi 10 mlrd dollar ekenin eskersek, ekonomikalıq jäne sayasi dağdarıstağı el üşin mwnıñ öte ülken aqşa ekenin añğaru qiın emes.

Venesuelada sonımen qatar gumanitarlıq dağdarıs ta örşip twr. Halıqtıñ basım böligi kündelikti ömir süruge qajetti qarapayım zattardı satıp alu mümkindiginen ayırılğan. Wlttıq valyuta bolivardıñ qwnı AQŞ penniiniñ onnan bir böligine teñ därejege deyin arzandağan.

Eger Nikolas Maduronıñ Uoll-strit investorlarımen kelissözderi sätsiz ayaqtalsa, eldi defolt kütip twr. Qarız beruşi taraptar memlekettiñ jalğız tabıs közi bolıp otırğan mwnayın baqılauğa aludı talap etui mümkin. Mwnday jağdayda halıq mwnaydan tüsetin aqşağa satıp alınatın tamaq pen däri-därmekten qağıladı. SNN Money tilşileri Venesuela Ükimetiniñ tiimsiz basqaruınan eldi auıl şaruaşılıq salası tolıqtay küyrep, qazir memleket barlıq azıq-tülik önimderiniñ barlıq türin importtaytın jağdayğa jetkenin jazadı.

Qarız beruşi investorlarmen kelisu oñay şarua emes. Mäselen, Argentina öziniñ sırtqı qarızdarın şeşe almay AQŞ-tıñ sottarında 15 jıl jürdi. Osı uaqıt aralığında halıqaralıq qarjı narıqtarına kiru qwqığınan ayırılğan Argentinanıñ ekonomikası qwldıradı. Qos taraptıñ qarım-qatınastarı Argentinanıñ Ükimeti auısqan 2016 jılı ğana retteldi.

“The Qazaq Times”