Saud patşası Salman äl-Saud Mäskeudegi twñğış saparında. Foto: WSJ

Keşe, 5 qırküyek beysenbi küni, Saud Arabiyasınıñ koroli Salman ibn äl-Saud Reseyge resmi saparlay barıp, RF prezidenti Vladimir Putinmen kezdesti. Bwl Saud Arabiya patşasınıñ alğaş ret orıs eline saparlay kelui. Sonımen birge bwl kezdesu Reseydiñ Tayau Şığıstağı ösip kele jatqan ıqpalın jäne eki iri mwnay öndiruşi el arasındağı energetikalıq odaqtıñ damuın ayqındaydı. Bwl turalı «WSJ» basılımı resmi saytında jazdı.

Resey Saud Arabiyası basqarıp kele jatqan Mwnay eksporttauşı elder wyımına (Organization of the Petroleum Exporting Countries) müşe emes. Alayda, 24 elde biılğı jılı kelisimşart boyınşa şiki mwnay bağasın köteru üşin, öndiristi künine şamamen 1,8 million barrel'ge deyin qısqarttı. Osı kezde Resey negizinen deldaldıq rölin oynadı deuge boladı.

Saud Arabiyası jäne Mwnay eksporttauşı elder wyımına müşe basqa memleketter Reseydiñ öndiristi qısqartu kelisim şartın kelesi jıldıñ naurız ayına deyin wzartuına küş salıp keledi. Putin särsenbi küni baspasöz mäjilisinde bwl kelisimşarttı qoldaytının, älde qoldamaytının aşıq aytpadı. Biraq, ol sözinde: «Biz kelisimge qol qoymadıq, biraq qol qoyatın bolsaq bwl şarttı 2018 jıldıñ naurız ayına deyin ğana emes, kelesi jıldıñ soñına deyin wzartuın talap etemiz», – degen edi.

Sarapşılardıñ pikirine jüginer bolsaq, bwl Reseydiñ diplomatiyalıq qadamdarınıñ biri. Saud Arabiyasınıñ korolimen kezdesu kezinde Resey özgede seriktestermen kelisimge keluge dayın ekenin añğarttı. Bwl bir esepten Qırım tübegin anneksiyalağannan keyin Reseyge salınğan sankciyanıñ salmağın jeñildetui de ğajap emes dep qaraydı.

“The Qazaq Times”