فوتو: sputniknews-uz.com

وزبەكستان قازاقستانعا ءالى دە ەلەكتر ەنەرگياسى ءۇشىن 11,3 ملن تەڭگە قارىز. بۇل تۋرالى KEGOC باسقارما توتاعاسى باقىتجان قاجيەۆ مالىمدەدى. 

بۇدان بولەك، كورشى ەلدىڭ ەنەرگەتيكا وكىلدەرى قازاقستاندىق KEGOC ەلەكتر جەلىلەرىن باسقارۋ كومپانياسىنا  140 ملن دوللاردان ارتىق (47,6 ملرد تەڭگە) سومادا قارىز بولعان. الايدا قازىرگى ۋاقىتتا قارىزدىڭ كوپ بولىگى جابىلعان.

ء"بىز اتالعان ەلمەن ءوزارا قارىم-قاتىناس كەلىسىمىن جاساعاندا، وزبەكتەردىڭ ەنەرگەتيكا جۇيەسىمەن كەلىسپەۋشىلىكتەر بولدى. ولار بىزگە 140 ميلليون دوللاردان استام قارىز بولعان. قازىر بۇل ماسەلەنى شەشۋ جۇمىستارى جۇرگىزىلۋدە جانە وسى بورىشتىڭ باسىم بولىگى وتەلدى. قازىرگى كەزدە قارىز قالدىعى - 11,3 ملن تەڭگە. بۇل كەستەگە سايكەس، جىلدىڭ سوڭىنا دەيىن تولەنەدى", - دەدى قاجيەۆ.

سونداي-اق، ول KEGOC تاريفتەرى 2020 جىلعا دەيىن بەكىتىلگەندىكتەن، قازاقستاندىق تۇتىنۋشىلار ءۇشىن ەلەكتر ەنەرگەتيكاسىنىڭ باعاسى ازىرگە وزگەرمەيتىنىن ايتتى. ونىڭ سوزىنشە، كومپانيا جىلۋ ماۋسىمىنا تولىق دايىن.

"قازىرگى كەزدە قازاقستاندا الداعى قىسقى كەزەڭدە وندىرەتىن قۋاتتىڭ ايتارلىقتاي رەزەرۆى بار. سوندىقتان قازاقستاندا تۇتىنۋشىلاردى ەلەكترمەن جابدىقتاۋعا قاتىستى ماسەلەلەر جوق. جالپى جىلۋ ماۋسىمىنا دايىندىق اياقتالدى. نەگىزگى ەنەرگەتيكا ورىندارى قالپىنا كەلتىرىلىپ، تەحنيكالىق قىزمەت كورسەتۋ جۇمىستارى جۇرگىزىلدى", - دەدى ول.

ايتا كەتەيىك، وسى اپتادا قر ۇلتتىق ەكونوميكا ۆيتسە-ءمينيسترى سەرىك جۇمانعارين 2018 جىلدان باستاپ قازاقستاندا كوممۋنالدىق قىزمەت تاريفتەرى جوسپارلى تۇردە قىمباتتايتىنىن مالىمدەگەن ەدى. ول "جاڭا جىلدان باستاپ ءبىز ۇزاق مەرزىمدى جوسپار بويىنشا تاريفتەردى كوتەرە باستايمىز. بىراق كوپ ەمەس، باعانى كوتەرۋ 10 پايىزدان اسپايدى" دەگەن. بۇدان بولەك پرەزيدەنت نۇرسۇلتان نازارباەۆ تا قىركۇيەك ايىنىڭ باسىندا ەلدەگى "كوممۋنالدىق تاريفتەردى قىمباتتاۋ" تۋرالى مالىمدەمە جاساعان بولاتىن.

“The Qazaq Times”