Foto: Vedomosti-Ukraina

Biıl Qırğızstan biligi Qazaqstan kömirinen soñğı 450 mıñ tonnanı satıp alıp, kelesi jıldan bastap importtı tolıq toqtatudı josparlap otır. Bwl turalı eldiñ wlttıq energetika holdinginiñ basşısı Aybek Qaliev ükimet otırısında mälimdedi, dep habarlaydı 24.kg.

Qırğızstan ministrler kabinetiniñ basşısı  Sapar Iskakov jinalıs kezinde "Memleket nelikten Qazaqstannan äli de kömir satıp alıp otırğanın jäne Bişkek jılu elektr stanciyası jergilikti kömirdi qaşan paydalana bastaytının" swrağan.

Bwğan Wlttıq energetika holdinginiñ basşısı jıl sayın qazaqstandıq kömirdi satıp alu qısqarıp kele jatqanın aytqan. Onıñ sözinşe, biıl importtalğan kömir kölemi eki esege, 400 mıñ tonnağa deyin azayğan (bıltırğı körsetkiş 700 mıñ tonna bolğan). Bwdan bölek qırğızstandıqtar joğarı kaloriyalı qazaqstandıq "D" markalı kömirdiñ ornına balama retinde "B" markalı kömirdi eksperimentten ötkizip jatır.

"Kelesi jılı biz kömir bağası boyınşa dayındıq jürgizuimiz kerek. Biz Euraziyalıq ekonomikalıq odaqqa şığamız, al mwnda bäsekelestik deñgeyi joğarı. Eger qazir biz tenderge qatıstı ötinişte "B" markalı kömir kerek desek, kelesi jılı da tek osı markanı körsete alamız", - dedi ol.

Sonday-aq, qırğız prem'eri memleket kömirdiñ işki narığın saqtap, keyin wtılıp qalmas üşin kömir sayasatın jürgizu kerek ekenin atap ötti.

"Bizde osı mäselege qatıstı strategiya boluı tiis. Sondıqtan Aybek Qalievke osı boyınşa naqtı wsınıs aytudı tapsıramın", - dedi ol.

Ayta keteyik, Qırğızstanda jılu mausımı kezinde jılu elektr stanciyalarına million tonnadan artıq kömir jwmsaladı.

“The Qazaq Times”