25 mausım küni Almatı oblısı Qonaev qalalıq sotında agro-sarapşı, azamattıq belsendi Almasbek Sadırbay jäne onımen birge ayıptalıp jatqan azamattarğa qatıstı qılmıstıq is boyınşa sot otırısı jalğastı. Tüske deyingi sot otırısında memlekettik ayıptauşı, Auıl şaruaşılığı basqarmasınıñ ökili jäne ayıptaluşılar arasında subsidiyalardı qaytaru tärtibi, memlekettik organnıñ qwzıreti men tergeu barısında jinalğan dälelderge qatıstı tartıstı pikirtalas ötti.

Sot hattamaları mäselesi köterildi

Ayıptaluşı Almasbek Sadırbay osı uaqıtqa deyin ötken sot otırıstarınıñ hattamaların qağaz nwsqasında ala almağandarın aytıp, QR Qılmıstıq-procestik kodeksiniñ talaptarına säykes barlıq processualdıq qwjattardı uaqıtılı berudi swradı jäne jäbirlenuşilerdiñ zalda birin biri tıñdap otıruı prosestik kodekiske qayşı ekenin aytıp jauap berip jatqanınan basqasın zaldan şığarudı swradı. Biraq sud'ya Qoyşıbaev ol ötiniş hattı qanağattandırmadı.

Subsidiyanı qaytaru mäselesi boyınşa pikirtalas

Kuä retinde jauap bergen Atırau oblıstıq Auıl şaruaşılığı basqarmasınıñ ökili Jaswlan Swltanğalievten Almasbek Sadırbay memlekettik organnıñ subsidiya qarajatın qaytarudı talap etuge qatıstı zañdıq qwzıreti jöninde swradı.

Basqarma ökili subsidiyalau qağidalarınıñ 25-tarmağına säykes investor tarapınan talaptar bwzılğan jağdayda jergilikti atqaruşı organ qarajattı qaytarudı talap etetinin ayttı.

Alayda ayıptaluşı basqarmanıñ osı qwzıretin bekitetin normativtik qwjattardı körsetudi swrağanda, jäbirlenuşi tarap ökili olardıñ özimen birge joq ekenin mälimdedi. Sud'ya atalğan qwjattardı kelesi sot otırısına alıp keludi tapsırdı.

Qarjınıñ qay byudjetten bölingenine qatıstı da pikirtalas boldı. Basqarma ökili qarajat oblıstıq byudjet arqılı bölingenin aytsa, Almasbek Sadırbay onıñ bastapqı közi respublikalıq byudjet ekenin alğa tartıp, osığan baylanıstı qosımşa swraqtar qoydı.

Tergeu materialdarına qatıstı ayıptaluşılardıñ uäjderi

Ayıptaluşı Almas Berlibatırov qılmıstıq is materialdarında mal şaruaşılığına qatıstı birqatar wğımdardıñ dwrıs qoldanılmağanın mälimdedi.

Onıñ aytuınşa, tergeu organdarı «jasandı wrıqtandıru» men «erkin şağılıstıru» wğımdarın özara şatastırğan. Ayıptaluşılardıñ pikirinşe, şaruaşılıqtardıñ ötinimderinde erkin şağılıstıru täsili naqtı körsetilgenine qaramastan, tergeu bwl män-jaydı tolıq eskermegen.

Sonday-aq olar tergeu barısında mal şaruaşılığı salasınıñ mamandarı tartılmağanın aytıp, bwl is boyınşa salalıq sarapşılardıñ qatısuı kerektigin ayttı.

Prokurormen pikirtalas, jäbirlenuşige ökpe

Otırıs soñında memlekettik ayıptauşı Älimjan Sanabaev pen Almasbek Sadırbay arasında pikirtalas örbidi.

Prokuror bwğan deyin jauap bergen birneşe öñirdiñ auıl şaruaşılığı basqarmaları iri qara mal şaruaşılığında jasandı wrıqtandıru talaptarına qatıstı tüsiniktemeler bergenin ayttı.

Almasbek Sadırbay bwl pikirmen kelispeytinin bildirip, prokurordıñ sotqa wsınğan mälimetterin naqtı jauap alu hattamalarımen däleldeudi talap etti.

Jetisu oblıstıq auıl şaraşılığı basqarmasınıñ ökili Mwrat Tileubaydıñ jauaptarına köñli tolmağan ayıptaluşı. "Men osında 21 aydan beri sender üşin otırmın. Senderdiñ dwrıs jwmıs jasay almağandarıñ üşin men osında otırmın" degen ökpesin ayttı.

Bwl küngi sot otırısında subsidiyalardı qaytaru tärtibi, memlekettik organnıñ qwzıreti, sonday-aq tergeu barısında jinalğan dälelderdiñ jetkiliktiligi men dwrıstığına qatıstı mäseleler keñinen talqılandı.

Bwl mäseleler boyınşa sot äzirge tüpkilikti qwqıqtıq bağa bergen joq. 26 mamırda arı qaray jalğasatın boldı.

Sot procesi ayaqtalğan soñ Almasbek Sadırbaydan pikir almaq bolğan BAQ ökilini sot pristavtarı men konvoylar kedergi keltirdi. Ayıptaluşı öziniñ qwqığı bwzılğanın, özine küş körsetilgenin aytıp şağındı.