Qazaqstanda kiberşabuılğa ilikken aqparat qwraldarı qwqıq qorğau organdarına arız tüsirdi. Wjımdıq arızğa Kursiv.Media, Inbusiness.kz, ProTenge, Shishkin_like, AIRAN jäne "Obojayu" jobasınıñ jurnalisteri qol qoyğan. Bwl turalı Ortalıq Aziya jañalıqtar qızmeti jazdı.

Bas redaktorlar men jurnalister arızdı cifrlıq damu jäne aqparat ministrligi men halıqaralıq qwqıq qorğau wyımdarına da jiberetinin mälimdedi.

Aqparatqa qarağanda, 17 qañtarda Almatıda Kursiv.Media keñsesinde hakerlik şabuılğa wşırağan BAQ ökilderi kezdesu ötkizgen.

"Bwl biz üşin qazaqstandıq aqparat qwraldarınıñ birligin körsetuge türtki bolatın jayt. Ärtürli redakciya ökilderi alğaş ret bas qosıp, birigip arız tapsırıp otır. Bizdiñ qatarımız köbeyip jatır, jalğız äreket etpeuimiz kerek" dedi Kursiv.Media bas redaktorı Mira Halina.

Qazaqstanda keyingi bir ayda bilikti sınaytın media jobalar men blogerlerdiñ äleumettik jelidegi paraqtarı, sayttarı kiberşabuılğa jii wşırap jür.

Ötken aptada "Obojayu" jobasınıñ avtorı, jurnalist Ashat Niyazov özi men tuıstarı jäne äriptesiniñ WhatsApp akkaunttarı bwzılğanın habarlağan.Onıñ aldında jurnalistiñ Instagram-dağı paraqşası men Telegram-dağı arnasına şabuıl jasalıp, YouTube-arnasındağı videolarğa türli akkaunttan "qoqan-loqı sipatındağı" mıñdağan pikir kelgenin habarlağan. Aytuınşa, jarnama beruşiler de kelisimdi toqtatqan.

Eldegi jemqorlıqtı äşkerelep jürgen ProTenge saytı da Instagram paraqşasına şabuıl jasalğanın habarlağan. Bwğan deyin QazTAG saytı da internet-resursqa Ddos-şabuıl üdegenin mälimdegen.

Kursiv.Media, Inbusiness.kz, Shishkin_like, AIRAN jobaları da joğarıda aytılğandarğa wqsas jayttardı bastan keşirgen. "Prosto jurnalistika" YouTube-arnasınıñ avtorı, täuelsiz jurnalist Lwqpan Ahmediyarov ta akkauntınıñ bwzılğanına şağımdanğan. Sayasi twtqındardı qoldauğa bağıttalğan "Erkindik marafonı" aldında belgisiz bireuler onıñ Kolesa.kz saytındağı akkauntın bwzıp kirip, kölik satatını jöninde habarlandıru jariyalağan. Jurnalistiñ telefon nömirin de körsetip qoyğan. Osıdan keyin jurnalistiñ telefonına üzdiksiz qoñıraular kelip tüsken.

“Ädil söz” wyımınıñ 15 jeltoqsandağı esebinşe, bıltır elde türli BAQ pen jurnalisterge 31 ret kiberşabuıl jasalğan. Wyım ökili mwnı “söz erkindigin şekteu”, “jurnalisterdi qorqıtu” dep atadı.

Qazaqstan konstituciyasında cenzurağa jol joq ekeni anıq jazılsa da bilikti sınaytın sayasi bwqaralıq aqparat qwraldarı jii bwğattalıp, kiber şabuıldarğa wşıraydı. Freedom House halıqaralıq wyımı öz esebinde Qazaqstandı wzaq jıldan beri interneti erkin emes memleketter qatarına qosıp jür.