Qılmıstıq-atqaru jüyesi komiteti Almatı qalasındağı N72 tergeu izolyatorındağı «äyelderdiñ aştıq jariyalauı» turalı aqparatqa baylanıstı tüsinikteme berdi. Bwğan deyin Qañtar oqiğası kezinde «äuejaydı basıp aldı» dep 4 jılğa sottalğan jurnalist, belsendi Äygerim Tileujannıñ advokatı Aynara Aydarhan özi qorğap otırğan belsendiniñ sözine süyenip, izolyatorda äyelderdiñ aştıq jariyalağanın Facebook paraqşasına jazğan.

– Almatı qalasınıñ tergeu izolyatorında qamalğandardıñ biri mekemege aştıq jariyalaytını jöninde arız tapsırdı. Biraq auruı asqındı degen aqparat şındıqqa säykes kelmeydi, – delingen komitettiñ Azattıq radiosına bergen jauabında.

Biraq Qılmıstıq-atqaru jüyesi komiteti «aştıq jariyalağandar qanday talap qoyıp otır?» degen swraqqa jauap bermegen.

25 şildede advokat Aynara Aydarhan Facebook paraqşasında izolyatorda aştıq jariyalağan äyelder qamau ornındağı jağdayğa narazı, ädil tergeu men sot şeşimin talap etude dep jazğan. Narazılardıñ biri bıltır qaraşada «jappay tärtipsizdik wyımdastırıp, bilikti basıp aludı josparladı» dep küdikpen wstalğan Bağdagül Andreeva (Qaliasqarova).

– Äyelder jetekşilikke arız jazğan, sebebi olardı basqalardan bölek wstauı kerek. Biraq 72 äyel ortaq kamerada otır, olardıñ qwqığı bwzılıp jatır. Äygerimmen bir kamerada otırğan äyelderdiñ işinde bireuiniñ astması asqınğan, ekinşisinde epilepsiya bar. Äygerim ayğaylap kömek şaqırmağanda olardıñ jağdayı qiın bolar edi. Belgili bir auruı bar adamdardı arnayı kamerada därigerdiñ baqılauında wstau kerek, – dep jazğanadvokat.

Äygerim Tileujan 11 şildede Qañtar oqiğası kezinde «Almatı äuejayın basıp almaq boldı» dep ayıptalıp, 4jılğa sottalğan. Odan özge is boyınşa 4 adam 8 jılğa bas bostandığınan ayırılğan. Sottaluşılardıñ eşqaysısı özine tağılğan ayıptı moyındamağan. Soñğı sözinde Äygerim Tileujan istiñ sayasi tapsırıs ekenin aytqan. Sot ükimi äli küşine engen joq. Ayıptaluşılar apellyaciyalıq sotqa şağım tüsirgen.

The Qazaq Times