قىلمىستىق-اتقارۋ جۇيەسى كوميتەتى الماتى قالاسىنداعى N72 تەرگەۋ يزولياتورىنداعى «ايەلدەردىڭ اشتىق جاريالاۋى» تۋرالى اقپاراتقا بايلانىستى تۇسىنىكتەمە بەردى. بۇعان دەيىن قاڭتار وقيعاسى كەزىندە «اۋەجايدى باسىپ الدى» دەپ 4 جىلعا سوتتالعان جۋرناليست، بەلسەندى ايگەرىم تىلەۋجاننىڭ ادۆوكاتى اينارا ايدارحان ءوزى قورعاپ وتىرعان بەلسەندىنىڭ سوزىنە سۇيەنىپ، يزولياتوردا ايەلدەردىڭ اشتىق جاريالاعانىن Facebook پاراقشاسىنا جازعان.

– الماتى قالاسىنىڭ تەرگەۋ يزولياتورىندا قامالعانداردىڭ ءبىرى مەكەمەگە اشتىق جاريالايتىنى جونىندە ارىز تاپسىردى. بىراق اۋرۋى اسقىندى دەگەن اقپارات شىندىققا سايكەس كەلمەيدى, – دەلىنگەن كوميتەتتىڭ ازاتتىق راديوسىنا بەرگەن جاۋابىندا.

بىراق قىلمىستىق-اتقارۋ جۇيەسى كوميتەتى «اشتىق جاريالاعاندار قانداي تالاپ قويىپ وتىر؟» دەگەن سۇراققا جاۋاپ بەرمەگەن.

25 شىلدەدە ادۆوكات اينارا ايدارحان Facebook پاراقشاسىندا يزولياتوردا اشتىق جاريالاعان ايەلدەر قاماۋ ورنىنداعى جاعدايعا نارازى، ءادىل تەرگەۋ مەن سوت شەشىمىن تالاپ ەتۋدە دەپ جازعان. نارازىلاردىڭ ءبىرى بىلتىر قاراشادا «جاپپاي تارتىپسىزدىك ۇيىمداستىرىپ، بيلىكتى باسىپ الۋدى جوسپارلادى» دەپ كۇدىكپەن ۇستالعان باعداگۇل اندرەەۆا (قالياسقاروۆا).

– ايەلدەر جەتەكشىلىككە ارىز جازعان، سەبەبى ولاردى باسقالاردان بولەك ۇستاۋى كەرەك. بىراق 72 ايەل ورتاق كامەرادا وتىر، ولاردىڭ قۇقىعى بۇزىلىپ جاتىر. ايگەرىممەن ءبىر كامەرادا وتىرعان ايەلدەردىڭ ىشىندە بىرەۋىنىڭ استماسى اسقىنعان، ەكىنشىسىندە ەپيلەپسيا بار. ايگەرىم ايعايلاپ كومەك شاقىرماعاندا ولاردىڭ جاعدايى قيىن بولار ەدى. بەلگىلى ءبىر اۋرۋى بار ادامداردى ارنايى كامەرادا دارىگەردىڭ باقىلاۋىندا ۇستاۋ كەرەك, – دەپ جازعانادۆوكات.

ايگەرىم تىلەۋجان 11 شىلدەدە قاڭتار وقيعاسى كەزىندە «الماتى اۋەجايىن باسىپ الماق بولدى» دەپ ايىپتالىپ، 4جىلعا سوتتالعان. ودان وزگە ءىس بويىنشا 4 ادام 8 جىلعا باس بوستاندىعىنان ايىرىلعان. سوتتالۋشىلاردىڭ ەشقايسىسى وزىنە تاعىلعان ايىپتى مويىنداماعان. سوڭعى سوزىندە ايگەرىم تىلەۋجان ءىستىڭ ساياسي تاپسىرىس ەكەنىن ايتقان. سوت ۇكىمى ءالى كۇشىنە ەنگەن جوق. ايىپتالۋشىلار اپەللياتسيالىق سوتقا شاعىم تۇسىرگەن.

The Qazaq Times