Tarazda Qañtarda «WQK podpolkovnigin öltirdi» dep ayıptalıp, 16 jılğa sottalğan Erbol Jwmanov pen özge bes adamnıñ apellyaciyalıq sotı jalğasuda. 21 şildede ötken sot otırısında sottaluşılardıñ qorğauşıları men tuıstarı tıñdaldı.

Advokat Aynur Usubalieva sottaluşı Jaqsılıq Abdullaev birinşi satıdağı sot ükimimen kelispeytinin, onı zañsız dep esepteytinin ayttı.

– Jaqsılıq Abdullaev işinara kelispeydi. Bwl ükim zañsız, negizsiz jäne küşin joyuğa jatadı dep sanaydı. QR QK 272-babınıñ 1-böligine say birde-bir ayğaq joq jäne sot barısında dälelin tapqan joq dep esepteymin, – dedi qorğauşı.

Onıñ sözinşe, tergeu barsında kuälardıñ jauaptarında qayşılıq bar.

Birinşi satıdağı sotta sud'ya Qadirbek Nwrjan Jaqsılıq Abdullaevtı 5 jılğa bas bostandığınan ayırğan. 

Jaqsılıq Abdullaevtıñ äyeli Äsem Şamşieva sot ükimimen kelispeytinin ayttı.

– Jaqsılıq Abdullaev QK 272-baptıñ 1-2-böligimen sottalıp, 5 jıl bas bostandığınan ayırıldı. Men jäne küyeuim bwl ükimmen kelispeymiz. Küyeuim 272-baptıñ 2-böligin tolıqtay moyındap otır. Alayda ol eşqanday wyımdastıruşı emes. «Jappay tärtipsizdik» kezinde ükimetke eşqanday talabı bolmağan... Küyeuim jalğız asırauşım. Sol sebepti sizderden Jaqsılıq Abdullaevtan 272-baptıñ 1-böligin alıp tastap, isti 272-baptıñ 2-böligimen saralap, raqımşılıq zañın qoldanudı swraymın, – dedi Şamşieva.

Birinşi satılı sottıñ şeşimimen 6 jılğa sottalğan 64 jastağı Nwrahan Mahatovtıñ äyeli Balqiya Ibraeva Qañtar oqiğası kezinde äkimdik pen prokuratura qızmetkerleri qaşıp ketpegende bwnday jağday bolmas edi dedi sotta söylegen sözinde. Onıñ aytuınşa,  tergeu kezinde küyeuiniñ üstinen jalğan kuälik beruge birneşe adamğa wsınıs jasalğan. Onıñ işinde öziniñ tuğan wlı Qanat Nwrahanwlı da bar.

– Şıñğıs degen prokuror mağan: «Küyeuiñizge aytıñız, balasına körsete salsın, şığaramız. Ol jas qoy, otıra beredi» dep ayttı... Prokuratura bwnı Belarus'tegi köterilispen, odan keyin mwnayşılardıñ ereuilimen baylanıstırdı. Tük tappağan soñ endi ekonomikalıq jağınan tekserudi bastadı. Qwday saqtap Nwrekeñ şetelmen jwmıs istegen joq. İstese şetelden qarjı aldı dep aytatın edi... Eger sol kezde äkimşilik pen prokuraturanı bwlar tastap qaşıp ketpegende bwnday jağday bolmas edi. Endi özderi otır haharman bolıp. Basımdı kesip alsañdarda aytayın, bwl arnayı tapsırıs nemese Jabıl oblısı boyınşa osınday qwrban kerek boldı, – dedi Ibraeva.

28 säuirde Nwrahan Mahatovtıñ wlı Qanat Nwrahanwlın birinşi satıdağı sot raqımşılıq zañın paydalanıp sot zalınan bosatqan. Apellyaciyalıq sotta prokuror Sayahat Bağdatwlı onı 7 jılğa bas bostandığınan ayırudı swrağan. 

Qañtar oqiğası kezinde «WQK podpolkovnigi Dastan Ädilbaydı öltirdi», «qaru-jaraq wrladı jäne saqtadı» dep ayıptalğan Erbol Jwmanovtıñ ağası Erjan Jwmanov sottıñ ötiniş-talaptardı qabıldamauın jüyemen baylanıstıradı. Onıñ sözinşe, sotqa joğarıdan ne aytadı, sonı orındaydı.

– Bizde jüye ğoy. Sol jüye ne aytadı, sonı isteytin siyaqtı. Sot joğarıdan ne aytadı, sonı orınday ma dep oylaymın. Özderiñiz körip otırsızdar, köp närsemizdi qaytarıp, qanağattandırmay jatır. Sud'ya mırza tek ayıptau tarapına qarap öziniñ bağasın berip jatır... Aqiqat tübi şığadı dep oylaymın. Jeltoqsan kezinde de sol kezdegi bilik ağa-äpkelerimizdi maskünem, bwzaqı degen. Qazir Jeltoqsan haharmandarın aqtadı ğoy. Bwl jerde meniñ inimniñ ömiri. Onıñ keyin aqtalğanı mağan kerek emes. 16 jıl degen bir adamnıñ ömiri ğoy,– dedi ol.

Advokat Jalğas Saparhanova apellyaciyalıq sotta birinşi satılı sottıñ is-äreketin qaytalayın dep otırğan siyaqtı dedi. Onıñ sözinşe, sottıñ ötiniş-talaptardı qanağattandırmauı sonday oyğa jeteleydi.

 – Biz bügingi üşinşi sot otırısında Erbol Jwmanovtıñ isine qatıstı jaña derekterdi, birinşi satılı sotta qaralmay ketken ötiniş hattardıñ barlığın wsınıp, berdik. Alayda birinşi satılı sot ob'ektivti, jan-jaqtı qamasağan bolsa, mına ekinşi satılı sotta sonı qaytalayın dep otırğan siyaqtı. Sondıqtan da bügin sotqa kümän tuıp otır, – dedi Saparhanova.

Kelesi sot otırısı 28 şilde 10:30 da tergeu izolyatorınıñ ğimaratında ötetin boldı. Demek, bwğan deyin sot zalına äkelinbegen sottaluşılardıñ bäri qatısuı mümkin.

Bwl is boyınşa 9 adam sottalğan. 28 säuirde sud'ya Qadirbek Nwrjan Erbol Jwmanovtı 16 jılğa, Nwrahan Mahatov pen Aybol Sağıntaydı 6 jılğa, Jaqsılıq Abdullaevtı 5 jılğa bas bostandığınan ayıru jazasına kesip, Qanat Nwrahanwlı, Ermahan Saylauov, Däuren Nwräliev, Dosmwhammed Sadıqov jäne Salamat Qosanovtı raqımşılıq zañın paydalanıp, sot zalınan bosatqan.