تارازدا قاڭتاردا «ۇقك پودپولكوۆنيگىن ءولتىردى» دەپ ايىپتالىپ، 16 جىلعا سوتتالعان ەربول جۇمانوۆ پەن وزگە بەس ادامنىڭ اپەللياتسيالىق سوتى جالعاسۋدا. 21 شىلدەدە وتكەن سوت وتىرىسىندا سوتتالۋشىلاردىڭ قورعاۋشىلارى مەن تۋىستارى تىڭدالدى.

ادۆوكات اينۋر ۋسۋباليەۆا سوتتالۋشى جاقسىلىق ابدۋللاەۆ ءبىرىنشى ساتىداعى سوت ۇكىمىمەن كەلىسپەيتىنىن، ونى زاڭسىز دەپ ەسەپتەيتىنىن ايتتى.

– جاقسىلىق ابدۋللاەۆ ءىشىنارا كەلىسپەيدى. بۇل ۇكىم زاڭسىز، نەگىزسىز جانە كۇشىن جويۋعا جاتادى دەپ سانايدى. قر قك 272-بابىنىڭ 1-بولىگىنە ساي بىردە-ءبىر ايعاق جوق جانە سوت بارىسىندا دالەلىن تاپقان جوق دەپ ەسەپتەيمىن، – دەدى قورعاۋشى.

ونىڭ سوزىنشە، تەرگەۋ بارسىندا كۋالاردىڭ جاۋاپتارىندا قايشىلىق بار.

ءبىرىنشى ساتىداعى سوتتا سۋديا قادىربەك نۇرجان جاقسىلىق ابدۋللاەۆتى 5 جىلعا باس بوستاندىعىنان ايىرعان. 

جاقسىلىق ابدۋللاەۆتىڭ ايەلى اسەم شامشيەۆا سوت ۇكىمىمەن كەلىسپەيتىنىن ايتتى.

– جاقسىلىق ابدۋللاەۆ قك 272-باپتىڭ 1-2-بولىگىمەن سوتتالىپ، 5 جىل باس بوستاندىعىنان ايىرىلدى. مەن جانە كۇيەۋىم بۇل ۇكىممەن كەلىسپەيمىز. كۇيەۋىم 272-باپتىڭ 2-بولىگىن تولىقتاي مويىنداپ وتىر. الايدا ول ەشقانداي ۇيىمداستىرۋشى ەمەس. «جاپپاي تارتىپسىزدىك» كەزىندە ۇكىمەتكە ەشقانداي تالابى بولماعان... كۇيەۋىم جالعىز اسىراۋشىم. سول سەبەپتى سىزدەردەن جاقسىلىق ابدۋللاەۆتان 272-باپتىڭ 1-بولىگىن الىپ تاستاپ، ءىستى 272-باپتىڭ 2-بولىگىمەن سارالاپ، راقىمشىلىق زاڭىن قولدانۋدى سۇرايمىن، – دەدى شامشيەۆا.

ءبىرىنشى ساتىلى سوتتىڭ شەشىمىمەن 6 جىلعا سوتتالعان 64 جاستاعى نۇراحان ماحاتوۆتىڭ ايەلى بالقيا يبراەۆا قاڭتار وقيعاسى كەزىندە اكىمدىك پەن پروكۋراتۋرا قىزمەتكەرلەرى قاشىپ كەتپەگەندە بۇنداي جاعداي بولماس ەدى دەدى سوتتا سويلەگەن سوزىندە. ونىڭ ايتۋىنشا،  تەرگەۋ كەزىندە كۇيەۋىنىڭ ۇستىنەن جالعان كۋالىك بەرۋگە بىرنەشە ادامعا ۇسىنىس جاسالعان. ونىڭ ىشىندە ءوزىنىڭ تۋعان ۇلى قانات نۇراحانۇلى دا بار.

– شىڭعىس دەگەن پروكۋرور ماعان: «كۇيەۋىڭىزگە ايتىڭىز، بالاسىنا كورسەتە سالسىن، شىعارامىز. ول جاس قوي، وتىرا بەرەدى» دەپ ايتتى... پروكۋراتۋرا بۇنى بەلارۋستەگى كوتەرىلىسپەن، ودان كەيىن مۇنايشىلاردىڭ ەرەۋىلىمەن بايلانىستىردى. تۇك تاپپاعان سوڭ ەندى ەكونوميكالىق جاعىنان تەكسەرۋدى باستادى. قۇداي ساقتاپ نۇرەكەڭ شەتەلمەن جۇمىس ىستەگەن جوق. ىستەسە شەتەلدەن قارجى الدى دەپ ايتاتىن ەدى... ەگەر سول كەزدە اكىمشىلىك پەن پروكۋراتۋرانى بۇلار تاستاپ قاشىپ كەتپەگەندە بۇنداي جاعداي بولماس ەدى. ەندى وزدەرى وتىر حاھارمان بولىپ. باسىمدى كەسىپ الساڭداردا ايتايىن، بۇل ارنايى تاپسىرىس نەمەسە جابىل وبلىسى بويىنشا وسىنداي قۇربان كەرەك بولدى، – دەدى يبراەۆا.

28 ساۋىردە نۇراحان ماحاتوۆتىڭ ۇلى قانات نۇراحانۇلىن ءبىرىنشى ساتىداعى سوت راقىمشىلىق زاڭىن پايدالانىپ سوت زالىنان بوساتقان. اپەللياتسيالىق سوتتا پروكۋرور ساياحات باعداتۇلى ونى 7 جىلعا باس بوستاندىعىنان ايىرۋدى سۇراعان. 

قاڭتار وقيعاسى كەزىندە «ۇقك پودپولكوۆنيگى داستان ءادىلبايدى ءولتىردى»، «قارۋ-جاراق ۇرلادى جانە ساقتادى» دەپ ايىپتالعان ەربول جۇمانوۆتىڭ اعاسى ەرجان جۇمانوۆ سوتتىڭ ءوتىنىش-تالاپتاردى قابىلداماۋىن جۇيەمەن بايلانىستىرادى. ونىڭ سوزىنشە، سوتقا جوعارىدان نە ايتادى، سونى ورىندايدى.

– بىزدە جۇيە عوي. سول جۇيە نە ايتادى، سونى ىستەيتىن سياقتى. سوت جوعارىدان نە ايتادى، سونى ورىنداي ما دەپ ويلايمىن. وزدەرىڭىز كورىپ وتىرسىزدار، كوپ نارسەمىزدى قايتارىپ، قاناعاتتاندىرماي جاتىر. سۋديا مىرزا تەك ايىپتاۋ تاراپىنا قاراپ ءوزىنىڭ باعاسىن بەرىپ جاتىر... اقيقات ءتۇبى شىعادى دەپ ويلايمىن. جەلتوقسان كەزىندە دە سول كەزدەگى بيلىك اعا-اپكەلەرىمىزدى ماسكۇنەم، بۇزاقى دەگەن. قازىر جەلتوقسان حاھارماندارىن اقتادى عوي. بۇل جەردە مەنىڭ ءىنىمنىڭ ءومىرى. ونىڭ كەيىن اقتالعانى ماعان كەرەك ەمەس. 16 جىل دەگەن ءبىر ادامنىڭ ءومىرى عوي،– دەدى ول.

ادۆوكات جالعاس ساپارحانوۆا اپەللياتسيالىق سوتتا ءبىرىنشى ساتىلى سوتتىڭ ءىس-ارەكەتىن قايتالايىن دەپ وتىرعان سياقتى دەدى. ونىڭ سوزىنشە، سوتتىڭ ءوتىنىش-تالاپتاردى قاناعاتتاندىرماۋى سونداي ويعا جەتەلەيدى.

 – ءبىز بۇگىنگى ءۇشىنشى سوت وتىرىسىندا ەربول جۇمانوۆتىڭ ىسىنە قاتىستى جاڭا دەرەكتەردى، ءبىرىنشى ساتىلى سوتتا قارالماي كەتكەن ءوتىنىش حاتتاردىڭ بارلىعىن ۇسىنىپ، بەردىك. الايدا ءبىرىنشى ساتىلى سوت وبەكتيۆتى، جان-جاقتى قاماساعان بولسا، مىنا ەكىنشى ساتىلى سوتتا سونى قايتالايىن دەپ وتىرعان سياقتى. سوندىقتان دا بۇگىن سوتقا كۇمان تۋىپ وتىر، – دەدى ساپارحانوۆا.

كەلەسى سوت وتىرىسى 28 شىلدە 10:30 دا تەرگەۋ يزولياتورىنىڭ عيماراتىندا وتەتىن بولدى. دەمەك، بۇعان دەيىن سوت زالىنا اكەلىنبەگەن سوتتالۋشىلاردىڭ ءبارى قاتىسۋى مۇمكىن.

بۇل ءىس بويىنشا 9 ادام سوتتالعان. 28 ساۋىردە سۋديا قادىربەك نۇرجان ەربول جۇمانوۆتى 16 جىلعا، نۇراحان ماحاتوۆ پەن ايبول ساعىنتايدى 6 جىلعا، جاقسىلىق ابدۋللاەۆتى 5 جىلعا باس بوستاندىعىنان ايىرۋ جازاسىنا كەسىپ، قانات نۇراحانۇلى، ەرماحان سايلاۋوۆ، داۋرەن نۇراليەۆ، دوسمۇحاممەد سادىقوۆ جانە سالامات قوسانوۆتى راقىمشىلىق زاڭىن پايدالانىپ، سوت زالىنان بوساتقان.