24 mausım tañda Mäskeuge qaray jorıq jasağan Evgeniy Prigojin şamamen 200 şaqırım qalğanda Belarus' prezidenti Aleksandr Lukaşenkonıñ ara ağayındığımen kelsimge kelip keri qaytqanı habarlandı.

Biraz uaqıttan beri Resey qorğanıs ministrligin ayıptap kele jatqan «Vagner» jekemenşik äskeri kompaniyasınıñ jeteşisi Evgeniy Prigojin 24 mausım tañ bozında qarulı qarsılıqqa şaqırıp qaramağındağı äskerin Mäskeuge qaray bağıttadı.

Resey Federaldıq qauipsizdik qızmeti qarulı bülikke şaqırqırdı dep ayıptağan «Vagner» Prigojinniñ üstinen qılmıstıq is qozğadı. Demen bwl ayıppen alda-jalda Prigojin qoldarına tüse qalsa 20 jılğa deyin qamau jazasın kütip twr degen söz.Bwl jöninde Resey Bas prokuraturası habarladı.

23 mausım jwmada Evgeniy Prigojin Resey qorğanıs ministrligi «Vagner» jauıngerlerin artilleriya men äskeri tikwşaq kömegimen atqılap jatır dep ayıptağan. Onıñ aytuınşa, osınıñ kesirinen onıñ äskerileri qaza tapqan.

Keşke qaray Prigojinniñ telegram-arnasında «eldiñ äskeri basşılığına qarsı» bülik bastap, «ädildik ornatatının» mälimdedi. Ol jwrttı «qarsılıq bildirmey beriluge» şaqırğan jäne qaramağında 25 mıñ sarbaz bar ekenin eskertken bolatın.

Osığan baylanıstı VVS-diñ habarlauında Mäskeude FSB basqarması men äskeriler dabıl boyınşa jwmıldırılğanı, Mäskeu men Rostov arasındağı federaldıq trassağa blokposttar qoyılıp Mäskeudegi memlekettik mekemelerdiñ mañına küzet qoyılğanı turalı aytıldı.

Bwl oqiğa turalı key sarapşılar Reseyde «azamat soğısı bastaldı» degen pikir ayttı.

Arada köp ötpey «Vagner» tıbınıñ Rastov qalasın basıp alğanı turalı habar taradı.

Rostovtağı 161.ru saytı oqırmandardan kelip tüsken suret pen videolarğa süyene otırıp, kamuflyaj kigen belgisiz top  – Oñtüstik äskeri okrug ştabı; Budennov policiya bölimşesi; İİM bölimşesi; FSB basqarması; Rostov äkimşiligi ğimarattarın qorşap alğanın habarladı.

«Vagner» tobına jaqın Telegram-arnalarında Prigojin Şoygudıñ orınbasarlarınıñ birimen kezdeskeni habarlandı.

Videoda Prigojin Rostovtağı oñtüstik äskeri okrugta otırğanı jäne qorğanıs ministriniñ orınbasarı YUnus-Beko Evkurovpen kelissöz jürgizip jatqanı körinedi. Aqparatqa qarağanda, «Vagner» jetekşisi bas ştab jetekşisi Gerasimov pen qorğanıs ministri Şoygudı kelissözge şaqırğan. Prigojin sonımen birge jaldamalı äsker Dondağı Rostovtağı äskeri nısandardı, onıñ işinde aerodromdı da baqılauğa alğanın aytqan. Soñğı mälimdemesinde Prigojin [Ukrainadağı soğısta] keybir künderi adam şığını mıñğa deyin baratının aytqan. «Köp jerden ayırıldıq. Ölgen soldattar sanı joğarığa jiberiletin qwjatta körsetiletin körsetkişten üş, tört ese köp» dedi Prigojin.

Resey qorğanıs ministrligi «Vagner» jaldamalı äskerine mälimdeme jasadı Vedomstvonıñ aytuınşa, jaldamalı äskerdi «Prigojinniñ qılmıstıq avantyurası men qarulı büligine aldap tartqan»; Qorğanıs ministrliginiñ aytuınşa, «Vagnerdiñ» keybir jauıngerleri «qatelik jasağanın tüsinip», kömek swrağan. Vedomstvo «Vagner» tobın aqılğa kelip, Resey qorğanıs ministrligi nemese qwqıq qorğau organdarına baylanısqa şığuğa şaqırdı.

Al Putin mırza Reseydiñ memleket arnalarınan «reseylikterge, äskeri jäne küştik qwrılım ökilderine jäne aldau jäne qoqan-loqı arqılı qarulı bülikke tartılğandarğa» ündeu tastadı. Ol «Vagnerdiñ äreketin «twtqiıldan jasalğan soqqı» dep atap, oqiğanı «opasızdıq pen memleketti satuğa» teñedi. «Biz satqındıqqa kez boldıq, şeksiz ambiciya Reseyge satqındıq jasauğa itermeledi» dedi Putin. Ol qarulı bülikke barğandar tiisti jazasın aladı dedi. Putin mälimdemesinde Evgeniy Prigojinniñ atın atamadı.

Arı qaray älem jelide «Vagner» tobı turalı türli pikir aytılıp jattı. Sonday-aq Mäskeuden, jalpı Reseyden azamattardıñ ketip jatqanı turalı da söz boldı.

Mäskeu mañında M-4 «Don», M-5 «Oral» jäne M-2 «Qırım» trassaları jartılay jabıldı, dep habarladı Mäskeu oblısınıñ kölik basqarması. Bwğan qosa, YAroslav şossesi de işinara bekitilgen. Bwğan deyin Voronej oblısında M-4 «Don» trassasınıñ 464 pen 777-şaqırımındağı bölik jabılğanı habarlanğan bolatın.

Tüs qayta «Prigojinniñ baspasöz qızmeti» «Vagner» basşısınıñ «Prezident otanğa satqındıq jasadı degen jerinde qatelesti. Biz otanımızdıñ patriotımız, soğıstıq, qazir de soğısıp jatırmız jäne eşkim de prezident, FSB bolmasa tağı basqa bireudiñ talabına bas iip, berileyin dep otırğan joq. Sebebi biz memlekettiñ jemqorlıqqa, byurokratiya men ötirikke maldanğan küyi ömir sürgenin qalamaymız” degen dıbıstıq jazbasın taratı.

Rostovta oñtüstik äskeri okrug ştabında jarılıs boldı. Artınşa Resey äue-ğarış küşterine tiesili Ka-52 tikwşağınıñ “Voronejdegi mwnay qoymasına soqqı jasağanı” turalı video (“Vagner” tobında Ka-52 tikwşağı joq) jariyalandı. Key aqparatqa qarağanda, tikwşaq “Vagner” äskerine mwnay qoymasın basıp aluına kedergi jasauğa tırısqan. Bwl aqparattı tekseru mümkin bolmadı. Bwğan qosa, äleumettik jelide “Vagner” äskeriniñ tikwşaqtı atıp tüsiruge wmtılğanı turalı video da jariyalandı.

Keşqwrım «Nastoyaşee vremya» arnasındağı «Sistema» zertteu jobasınıñ jurnalisi Dmitriy Suharev tikeley efirde bergen swhbatında Vladimir Putin Mäskeuden Valdayğa wşıp ketken boluı äbden mümkin ekenin ayttı. Onıñ aytuınşa, Kreml'diñ tek Resey prezidenti wşatın eki wşağı bar, sonıñ biri - IL-96. Bwl wşaqtı Vladimir Putinnen basqa eşkim qoldanbaydı. Jurnalistiñ deregi boyınşa, bügin Mäskeuden «Rossiya» arnayı wşu otryadınıñ üş wşağı wşıp şıqqan, sonıñ biri – osı IL-96. Ol Valday qalasınıñ twsına barğanda radardan körinbey qalğan. Valday – Mäskeuden 380 km, Sankt-Peterburgten 140 km jerde, köl jağasında ornalasqan qalaşıq. Onda Resey prezidentiniñ rezidenciyası bar» degen aqparat taradı.

Tün ortasında, Lukaşenko Prigojinmen kelisimge kelgenin mälimdedi. Bwnı Lukaşenkonıñ baspasöz qızmetiniñ habarladı.

Belarus' basşısı Putinniñ kelisimimen Evgeniy Prigojinmen kelissöz jürgizgen. Nätijesinde ekeui «Resey aumağında qantögiske jol bermeuge» kelisken. Aqparatqa qarağanda, Prigojin Lukaşenkonıñ «Resey aumağında Vagner äskeriniñ jorığın toqtatu turalı» wsınısın qabıldağan jäne jağdaydı uşıqtırmauğa kelisken. «Qazir tüytkildi şeşu üşin öte tiimdi jäne orındı wsınıs aytılıp jatır, Vagner jauıngerleriniñ qauipsizdigine de kepildik beriledi» dep habarladı. Alayda, bwl turalı Prigojin men Resey biligi tüsinikteme bermedi.

Lukaşenkonıñ mälimdemesinen keyin ile-şala Prigojinniñ: «Jigitter, miniñder, üyge qaytamız!» degen audiosı jariyalandı. Keyingi audiojazbasında Prigojin «zattarın jinap, keri qaytatındar» degen. Sonımen birge ol «Vagner» äskerimen bir täulikte 200 km jol jürip, «jauıngerlerdiñ bir tamşı qanın tökpegenin» aytıp alda da «orıstardıñ qanı tögilmes üşin» Mäskeu tübindegi kolonnanı keri bwrıp, «jospar boyınşa artqa qaytıp, daladağı lager'lerine baratının» mälimdedi. Onıñ qanday jospar turalı aytqanı belgisiz. Ol Lukaşenkomen arada boldı degen kelissöz turalı da eşteñe aytpadı.