Taşkentte Qaraqalpaqstandağı şilde oqiğasına qatıstı qılmıstıq is ayasında apellyaciyalıq şağım qaralıp jatır. Arızdı 16 sottaluşı tüsirgen, al prokuratura 4 adamnıñ şarttı jaza aluına qarsılıq bildirgen. Bwl turalı Ortalıq Aziya jañalıqtar qızmeti jazdı.

5 mamırda bastalğan apellyaciyalıq sot barısında jurnalist Däuletmwrat Täjimwratovtıñ, Qaraqalpaqstan İİM qılmıstıq izdestiru jönindegi bölimniñ bwrınğı basşısı, marqwm Polat Şämşetovtiñ jäne basqa da sottaluşılardıñ, sonımen birge olardıñ advokattarınıñ şağımdarı qaralıp jatır.

Sottıñ alğaşqı instanciyasımen 6 jılğa sottalğan Polat Şämşetov biıl 4 aqpanda Bwharadağı türmede qaytıs bolğan. Medicinalıq saraptama küdikti ölimine jürek auruı sebep bolğanın anıqtağan.

Prokuratura sottaluşı Lolagül Qallıhanovanıñ, Azamat Twrdanovtıñ, Ahmet Smetullaevtıñ jäne Azamat Nwratdinovtiñ şarttı jaza alıp, sot zalında bosatılğanına şağım tüsirgen.

Qañtar ayında Bwhara oblıstıq sotı Qaraqalpaqstanda bıltır 1-2 şildedegi oqiğağa baylanıstı 22 adamğa ükim şığardı. Sot şeşimimen bastı küdikti Däuletmwrat Täjimwratov 16 jılğa sottaldı, 17 adamğa 3 jıldan 8,5 jılğa deyingi aralıqta jaza belgilendi, tört adam sot şeşimimen bosatıldı, olardıñ arasında Lolagül Qallıhanova da bar.

17 naurızda Nökis oqiğasına qatıstı iste 39 küdiktige qatıstı ekinşi sot ükimi jariyalandı. Sot 28 adamdı 5 jıldan 11 jılğa deyingi aralıqta sottadı, al 11 sottaluşı şarttı jazamen bostandıqqa şıqtı.

Resmi mälimet boyınşa, Nökistegi oqiğa barısında 21 adam qaza boldı, 243 adam jaralandı, olardıñ arasında qwqıq qorğau organdarınıñ qızmetkerleri de bar. Qaraqalpaqstandağı basköteru küşpen basıldı, biraq özbek biligi köşege şıqqandarğa äskeriler oq attı degendi joqqa şığarıp otır.

Bwnıñ aldında AQŞ, Euroodaq, BWW jäne halıqaralıq adam qwqıqtarın qorğauşı wyımdar Özbekstan biligin Qaraqalpaqstandağı oqiğanı ädil tergeuge, beybit halıqqa küş qoldanılğanın zertteuge şaqırğan. Alayda ekinşi sot procesinde sottaluşılar arasında küş qwrılımdarınıñ qızmetkerleri bolğan joq.