تاشكەنتتە قاراقالپاقستانداعى شىلدە وقيعاسىنا قاتىستى قىلمىستىق ءىس اياسىندا اپەللياتسيالىق شاعىم قارالىپ جاتىر. ارىزدى 16 سوتتالۋشى تۇسىرگەن، ال پروكۋراتۋرا 4 ادامنىڭ شارتتى جازا الۋىنا قارسىلىق بىلدىرگەن. بۇل تۋرالى ورتالىق ازيا جاڭالىقتار قىزمەتى جازدى.

5 مامىردا باستالعان اپەللياتسيالىق سوت بارىسىندا جۋرناليست داۋلەتمۇرات ءتاجىمۇراتوۆتىڭ، قاراقالپاقستان ءىىم قىلمىستىق ىزدەستىرۋ جونىندەگى ءبولىمنىڭ بۇرىنعى باسشىسى، مارقۇم پولات شامشەتوۆتىڭ جانە باسقا دا سوتتالۋشىلاردىڭ، سونىمەن بىرگە ولاردىڭ ادۆوكاتتارىنىڭ شاعىمدارى قارالىپ جاتىر.

سوتتىڭ العاشقى ينستانتسياسىمەن 6 جىلعا سوتتالعان پولات شامشەتوۆ بيىل 4 اقپاندا بۇحاراداعى تۇرمەدە قايتىس بولعان. مەديتسينالىق ساراپتاما كۇدىكتى ولىمىنە جۇرەك اۋرۋى سەبەپ بولعانىن انىقتاعان.

پروكۋراتۋرا سوتتالۋشى لولاگۇل قاللىحانوۆانىڭ، ازامات تۇردانوۆتىڭ، احمەت سمەتۋللاەۆتىڭ جانە ازامات ءنۇراتدينوۆتىڭ شارتتى جازا الىپ، سوت زالىندا بوساتىلعانىنا شاعىم تۇسىرگەن.

قاڭتار ايىندا بۇحارا وبلىستىق سوتى قاراقالپاقستاندا بىلتىر 1-2 شىلدەدەگى وقيعاعا بايلانىستى 22 ادامعا ۇكىم شىعاردى. سوت شەشىمىمەن باستى كۇدىكتى داۋلەتمۇرات ءتاجىمۇراتوۆ 16 جىلعا سوتتالدى، 17 ادامعا 3 جىلدان 8,5 جىلعا دەيىنگى ارالىقتا جازا بەلگىلەندى، ءتورت ادام سوت شەشىمىمەن بوساتىلدى، ولاردىڭ اراسىندا لولاگۇل قاللىحانوۆا دا بار.

17 ناۋرىزدا نوكىس وقيعاسىنا قاتىستى ىستە 39 كۇدىكتىگە قاتىستى ەكىنشى سوت ۇكىمى جاريالاندى. سوت 28 ادامدى 5 جىلدان 11 جىلعا دەيىنگى ارالىقتا سوتتادى، ال 11 سوتتالۋشى شارتتى جازامەن بوستاندىققا شىقتى.

رەسمي مالىمەت بويىنشا، نوكىستەگى وقيعا بارىسىندا 21 ادام قازا بولدى، 243 ادام جارالاندى، ولاردىڭ اراسىندا قۇقىق قورعاۋ ورگاندارىنىڭ قىزمەتكەرلەرى دە بار. قاراقالپاقستانداعى باسكوتەرۋ كۇشپەن باسىلدى، بىراق وزبەك بيلىگى كوشەگە شىققاندارعا اسكەريلەر وق اتتى دەگەندى جوققا شىعارىپ وتىر.

بۇنىڭ الدىندا اقش، ەۋرووداق، بۇۇ جانە حالىقارالىق ادام قۇقىقتارىن قورعاۋشى ۇيىمدار وزبەكستان بيلىگىن قاراقالپاقستانداعى وقيعانى ءادىل تەرگەۋگە، بەيبىت حالىققا كۇش قولدانىلعانىن زەرتتەۋگە شاقىرعان. الايدا ەكىنشى سوت پروتسەسىندە سوتتالۋشىلار اراسىندا كۇش قۇرىلىمدارىنىڭ قىزمەتكەرلەرى بولعان جوق.