11 säuir keşte Astana qalasındağı energetika sinistrliginiñ aldında jwmıs dauımen twrğan Jañaözennen kelgen 82 mwnayşını arnayı jasaq küştep wstap ketken. Osığan baylanıstı Astana qalalıq policiya departamenti tüsinikteme berdi.

Olardıñ aytuınşa:

«Mitingilerdiñ «Beybit jiındar turalı» zañdı bwzuına baylanıstı jergilikti atqaruşı organdarğa miting ötkizuge, sonday-aq mäslihattıñ jergilikti şeşimi tizbesinde bekitilmegen jerde rwqsat etilmegen miting ötkizuge ötinimniñ bolmauı sebepti policiyağa akciyanıñ birqatar wyımdastıruşıları men belsendi qatısuşıları jetkizildi» delingen.

Äri beybit jiınğa qatısuşılar äkimşilik jauapqa tartıluı mümkin ekendigin de ayttı.

«Tärtip bwzuşılar ÄQBtK- niñ 488 jäne 667-baptarı boyınşa äkimşilik jauapkerşilikke tartıladı. Bwl eskertuge nemese otız aylıq eseptik körsetkiş mölşerinde ayıppwl saluğa ne on bes täulikke deyingi merzimge äkimşilik qamauğa aluğa teñ. Olardıñ is-äreketterine qoldanıstağı zañnamağa säykes qwqıqtıq bağa beriletin boladı» dedi policiya departamentidegiler.

Bwğan deyin energetika ministri Almasadam Sätqaliev te mwnayşılar turalı oğaş oyın aytqan-twğın.

«Bwl – wyımdasqan piket. Adamdar körpe-tösegi men palatkasın alıp kelgen. Olardıñ negizgi maqsatı – özine nazar audartu. Bwl – olardıñ qalauı. Talaptarı kommunaldıq tölem siyaqtı naqtı mäsele töñireginde bolsa eskerer edik. Meniñ tüsinigimşe, akciya nazar audartıp, ajiotaj jasauğa köbirek wqsaydı. Qızmetkerlerdiñ jwmısqa kirip-şığuı qiındadı. Sondıqtan memlekettik organ qızmetine jasalğan kedergi boluı da mümkin. Jergilikti äkimdik pen «Özenmwnaygaz» kompaniyası ne istegenin bilmeysizder ğoy. Olarğa balama jwmıs wsınğan. Biz öz müdesi üşin osı azamattardı paydalanıp, tender konkursınıñ zañdı nätijesine qarsı şıqqan jeke kompaniya basşıları emes, qarapayım adamdar turalı aytıp otırmız. Al, qarapayım azamattar müdesin biz meylinşe qorğadıq. Aldıñğısınan kem tüspeytin wsınıs aytıldı. Biraq köbi odan bas tarttı. Aqırı energetika ministrligi aldına piketke şığu turalı şeşimge kelgen. Kelissöz boladı.» – degen bolatın ministr mırza.