11 ءساۋىر كەشتە استانا قالاسىنداعى ەنەرگەتيكا سينيسترلىگىنىڭ الدىندا جۇمىس داۋىمەن تۇرعان جاڭاوزەننەن كەلگەن 82 مۇنايشىنى ارنايى جاساق كۇشتەپ ۇستاپ كەتكەن. وسىعان بايلانىستى استانا قالالىق پوليتسيا دەپارتامەنتى تۇسىنىكتەمە بەردى.

ولاردىڭ ايتۋىنشا:

«ميتينگىلەردىڭ «بەيبىت جيىندار تۋرالى» زاڭدى بۇزۋىنا بايلانىستى جەرگىلىكتى اتقارۋشى ورگاندارعا ميتينگ وتكىزۋگە، سونداي-اق ءماسليحاتتىڭ جەرگىلىكتى شەشىمى تىزبەسىندە بەكىتىلمەگەن جەردە رۇقسات ەتىلمەگەن ميتينگ وتكىزۋگە ءوتىنىمنىڭ بولماۋى سەبەپتى پوليتسياعا اكتسيانىڭ بىرقاتار ۇيىمداستىرۋشىلارى مەن بەلسەندى قاتىسۋشىلارى جەتكىزىلدى» دەلىنگەن.

ءارى بەيبىت جيىنعا قاتىسۋشىلار اكىمشىلىك جاۋاپقا تارتىلۋى مۇمكىن ەكەندىگىن دە ايتتى.

«ءتارتىپ بۇزۋشىلار اقبتك- ءنىڭ 488 جانە 667-باپتارى بويىنشا اكىمشىلىك جاۋاپكەرشىلىككە تارتىلادى. بۇل ەسكەرتۋگە نەمەسە وتىز ايلىق ەسەپتىك كورسەتكىش مولشەرىندە ايىپپۇل سالۋعا نە ون بەس تاۋلىككە دەيىنگى مەرزىمگە اكىمشىلىك قاماۋعا الۋعا تەڭ. ولاردىڭ ءىس-ارەكەتتەرىنە قولدانىستاعى زاڭناماعا سايكەس قۇقىقتىق باعا بەرىلەتىن بولادى» دەدى پوليتسيا دەپارتامەنتىدەگىلەر.

بۇعان دەيىن ەنەرگەتيكا ءمينيسترى الماسادام ساتقاليەۆ تە مۇنايشىلار تۋرالى وعاش ويىن ايتقان-تۇعىن.

«بۇل – ۇيىمداسقان پيكەت. ادامدار كورپە-توسەگى مەن پالاتكاسىن الىپ كەلگەن. ولاردىڭ نەگىزگى ماقساتى – وزىنە نازار اۋدارتۋ. بۇل – ولاردىڭ قالاۋى. تالاپتارى كوممۋنالدىق تولەم سياقتى ناقتى ماسەلە توڭىرەگىندە بولسا ەسكەرەر ەدىك. مەنىڭ تۇسىنىگىمشە، اكتسيا نازار اۋدارتىپ، اجيوتاج جاساۋعا كوبىرەك ۇقسايدى. قىزمەتكەرلەردىڭ جۇمىسقا كىرىپ-شىعۋى قيىندادى. سوندىقتان مەملەكەتتىك ورگان قىزمەتىنە جاسالعان كەدەرگى بولۋى دا مۇمكىن. جەرگىلىكتى اكىمدىك پەن «وزەنمۇنايگاز» كومپانياسى نە ىستەگەنىن بىلمەيسىزدەر عوي. ولارعا بالاما جۇمىس ۇسىنعان. ءبىز ءوز مۇدەسى ءۇشىن وسى ازاماتتاردى پايدالانىپ، تەندەر كونكۋرسىنىڭ زاڭدى ناتيجەسىنە قارسى شىققان جەكە كومپانيا باسشىلارى ەمەس، قاراپايىم ادامدار تۋرالى ايتىپ وتىرمىز. ال، قاراپايىم ازاماتتار مۇدەسىن ءبىز مەيلىنشە قورعادىق. الدىڭعىسىنان كەم تۇسپەيتىن ۇسىنىس ايتىلدى. بىراق كوبى ودان باس تارتتى. اقىرى ەنەرگەتيكا مينيسترلىگى الدىنا پيكەتكە شىعۋ تۋرالى شەشىمگە كەلگەن. كەلىسسوز بولادى.» – دەگەن بولاتىن مينيستر مىرزا.