Qañtar oqiğası kezinde azaptalğan Bauırjan Äliasqarovtı «Taldıqorğandağı jappay tärtipsizdikti wyımdastırdı» degen ayıppen sottamaq. 

Bauırjan Äliasqarovtıñ ağası Jomart Äliasqarovtıñ sözinşe, bauırınıñ türmede otırğanına 1 jıldan asqan. Qañtar oqiğası kezinde onı tergeu izolyatorında azaptap, qabırğasın, tisin sındırıp, basına paket kigizip, qinağan. Azaptauğa şıdamağan ol öz-özine qol jwmsamaq bolğan.

– Bauırımdı 2022 jılı 30 qañtarda Almatıdağı üyinde wstap, Taldıqorğan qalasındağı uaqıtşa wstau izolyatorına qamağan. Ol özin kinälimin dep eseptemeydi. Onı tergeu izolyatorında otırğanda böten adamdar kelip, tergep, qısım jasağan. Basına cellofan kigizip, qinağan, tepkilep, qabırğasın, tisin sındırğan, tırnağınıñ astına ine tıqqan. «Kinäñdi moyında» dep mäjbürlegen. «Qaru qayda?» dep swrağan. «Seni öltiremiz» degen soñ, bauırım qısımğa şıdamay, öz-özine qol jwmsağan. Qolınıñ tamırın kesken. Ölmekşi bolğan. Alğaşqı kömek körsetilmegen. Arı qaray da em qabıldamağan, – deydi ol.

Jomart Äliasqarovtıñ aytuınşa, tergeu kezinde bauırına memlekettik advokat Jambıl Esimhannıñ qatısuımen kerekti jauaptarğa qol qoydırıp alğan. Onıñ keltirgen dälelderin iske tirkemegen. Azaptau boyınşa isti de toqtatıp tastağan.

– Memlekettik qorğauşı Jambıl Esimhannıñ qatısuımen özderine kerekti jauapqa qol qoydırıp alğan. Onıñ wsınğan dälelderin tekserip, zañdastırmağan, iske de tirkemegen. Anıq dälelderi joq. Bir jıldan astam uaqıttan beri qamauda otır. Azaptalğanın qasında birge otırğan jigitter biledi. Barlığı körgen. Tayaq jegenin, azaptalğanın moyındata almay otırmız. Ükimet moyındamay otır. «Dälel joq» dep isti jauıp tastadı, – deydi Jomart Äliasqarov. 

Bauırjan Äliasqarov türmeden hat joldağan. Onda ol azaptau saldarınan densaulığınan ayırılğanın, Qañtarda beybit mitingke şığıp, eşqanday qaru almağanın, tonaumen aynalıspağanın aytıp, mitingke qatısqan adamdardan kömek swrağan.

– Men 2022 jılı 5 qañtarda bolğan beybit miting qatısuşısımın. Men wyımdastıruşı emespin. Eşkimdi tonamadım, qolıma qaru almadım. Densaulığıma şağımım bar. Basım auıradı, qan qısımım joğarı. Bwnıñ barlığı azaptaudıñ saldarı dep oylaymın. Barlıqtarıñız bizdi İİD qalay wrğanın, ütik basıp, azaptağanın bilip, estigen şığarsızdar. Meniñ jasım 50-de, tört balam bar. Ekeui student, ekeui kämeletke tolmağan. Beybit mitingke qatısqan adamdardan şın mäninde qalay bolğanın aytıp, arız jazularıñızdı swraymın, – degen Bauırjan Äliasqarov hatında.

Jomart Äliasqarov wstalğan kezde bauırınıñ densaulığında eşqanday aqau bolmağan. Taldıqorğanğa aparmas bwrın, İle audanınıñ policiya böliminde teksergen deydi.

Onıñ sözinşe, tergeuşiler birneşe jigitke qısım jasap, bauırına qarsı arız jazdırğan. Qasında otırğan adamdardıñ barlığı qalay bolğanın biledi. Biraq aytuğa qorqadı. Sebebi türmede barlığın azaptağan.

– Eki-üş bala meniñ bauırıma qarsı kuälik berip, şığıp ketken. Men keyin sol jigitterdiñ birazımen söylestim. Olar «biz jala jauıp sottalğımız kelmedi, sol üşin osındayğa bardıq» dedi. Olardı meniñ bauırım tanımaydı da. Olar 20-30 jasta. Meniñ bauırım 50 jasta. Negizi qasında otırğan jigitter barlığın biledi. Biraq olar aytuğa qorqadı. Ol jerde tayaq jemegen adam joq, barlığı tayaq jegen. Qattı soqqıdan 25-30 jastağı jigitter bwttarına siip qoyğan.Sonday adamdar bolğan, – deydi ol. 

Bauırjan Äliasqarov taksi bolıp jwmıs istegen. Bala-şağasımen birge Almatıda päter jaldap twrğan. Qañtar oqiğası kezinde Taldıqorğanğa äpkesin auruhanağa qaratuğa alıp barğan. Sol jerde beybit mitingke qatısıp, sınıptas, dostarına sms hat joldap, beybit mitingke şaqırğan. Jomart Äliasqarovtıñ aytuınşa, bauırınıñ jibergen audio habarlamasına saraptama jasalğan jäne «dauısta agressiya joq» degen qorıtındı şığarılğan.

Qazir Bauırjan Äliasqarovtıñ üstinen «jappay tärtipsizdikke qatısu» jäne «jappay tärtipsizdik wyımdastıru» baptarı boyınşa ayıp tağılğan. Jomart Äliasqarovtıñ sözinşe, bauırı Taldıqorğanda Qañtar oqiğası boyınşa qamauda otırğan jalğız adam.