قاڭتار وقيعاسى كەزىندە ازاپتالعان باۋىرجان الياسقاروۆتى «تالدىقورعانداعى جاپپاي تارتىپسىزدىكتى ۇيىمداستىردى» دەگەن ايىپپەن سوتتاماق. 

باۋىرجان الياسقاروۆتىڭ اعاسى جومارت الياسقاروۆتىڭ سوزىنشە، باۋىرىنىڭ تۇرمەدە وتىرعانىنا 1 جىلدان اسقان. قاڭتار وقيعاسى كەزىندە ونى تەرگەۋ يزولياتورىندا ازاپتاپ، قابىرعاسىن، ءتىسىن سىندىرىپ، باسىنا پاكەت كيگىزىپ، قيناعان. ازاپتاۋعا شىداماعان ول ءوز-وزىنە قول جۇمساماق بولعان.

– باۋىرىمدى 2022 جىلى 30 قاڭتاردا الماتىداعى ۇيىندە ۇستاپ، تالدىقورعان قالاسىنداعى ۋاقىتشا ۇستاۋ يزولياتورىنا قاماعان. ول ءوزىن كىنالىمىن دەپ ەسەپتەمەيدى. ونى تەرگەۋ يزولياتورىندا وتىرعاندا بوتەن ادامدار كەلىپ، تەرگەپ، قىسىم جاساعان. باسىنا تسەللوفان كيگىزىپ، قيناعان، تەپكىلەپ، قابىرعاسىن، ءتىسىن سىندىرعان، تىرناعىنىڭ استىنا ينە تىققان. «كىناڭدى مويىندا» دەپ ماجبۇرلەگەن. «قارۋ قايدا؟» دەپ سۇراعان. «سەنى ولتىرەمىز» دەگەن سوڭ، باۋىرىم قىسىمعا شىداماي، ءوز-وزىنە قول جۇمساعان. قولىنىڭ تامىرىن كەسكەن. ولمەكشى بولعان. العاشقى كومەك كورسەتىلمەگەن. ارى قاراي دا ەم قابىلداماعان، – دەيدى ول.

جومارت الياسقاروۆتىڭ ايتۋىنشا، تەرگەۋ كەزىندە باۋىرىنا مەملەكەتتىك ادۆوكات جامبىل ەسىمحاننىڭ قاتىسۋىمەن كەرەكتى جاۋاپتارعا قول قويدىرىپ العان. ونىڭ كەلتىرگەن دالەلدەرىن ىسكە تىركەمەگەن. ازاپتاۋ بويىنشا ءىستى دە توقتاتىپ تاستاعان.

– مەملەكەتتىك قورعاۋشى جامبىل ەسىمحاننىڭ قاتىسۋىمەن وزدەرىنە كەرەكتى جاۋاپقا قول قويدىرىپ العان. ونىڭ ۇسىنعان دالەلدەرىن تەكسەرىپ، زاڭداستىرماعان، ىسكە دە تىركەمەگەن. انىق دالەلدەرى جوق. ءبىر جىلدان استام ۋاقىتتان بەرى قاماۋدا وتىر. ازاپتالعانىن قاسىندا بىرگە وتىرعان جىگىتتەر بىلەدى. بارلىعى كورگەن. تاياق جەگەنىن، ازاپتالعانىن مويىنداتا الماي وتىرمىز. ۇكىمەت مويىنداماي وتىر. «دالەل جوق» دەپ ءىستى جاۋىپ تاستادى، – دەيدى جومارت الياسقاروۆ. 

باۋىرجان الياسقاروۆ تۇرمەدەن حات جولداعان. وندا ول ازاپتاۋ سالدارىنان دەنساۋلىعىنان ايىرىلعانىن، قاڭتاردا بەيبىت ميتينگكە شىعىپ، ەشقانداي قارۋ الماعانىن، توناۋمەن اينالىسپاعانىن ايتىپ، ميتينگكە قاتىسقان ادامداردان كومەك سۇراعان.

– مەن 2022 جىلى 5 قاڭتاردا بولعان بەيبىت ميتينگ قاتىسۋشىسىمىن. مەن ۇيىمداستىرۋشى ەمەسپىن. ەشكىمدى تونامادىم، قولىما قارۋ المادىم. دەنساۋلىعىما شاعىمىم بار. باسىم اۋىرادى، قان قىسىمىم جوعارى. بۇنىڭ بارلىعى ازاپتاۋدىڭ سالدارى دەپ ويلايمىن. بارلىقتارىڭىز ءبىزدى ءىىد قالاي ۇرعانىن، ۇتىك باسىپ، ازاپتاعانىن ءبىلىپ، ەستىگەن شىعارسىزدار. مەنىڭ جاسىم 50-دە، ءتورت بالام بار. ەكەۋى ستۋدەنت، ەكەۋى كامەلەتكە تولماعان. بەيبىت ميتينگكە قاتىسقان ادامداردان شىن مانىندە قالاي بولعانىن ايتىپ، ارىز جازۋلارىڭىزدى سۇرايمىن، – دەگەن باۋىرجان الياسقاروۆ حاتىندا.

جومارت الياسقاروۆ ۇستالعان كەزدە باۋىرىنىڭ دەنساۋلىعىندا ەشقانداي اقاۋ بولماعان. تالدىقورعانعا اپارماس بۇرىن، ىلە اۋدانىنىڭ پوليتسيا بولىمىندە تەكسەرگەن دەيدى.

ونىڭ سوزىنشە، تەرگەۋشىلەر بىرنەشە جىگىتكە قىسىم جاساپ، باۋىرىنا قارسى ارىز جازدىرعان. قاسىندا وتىرعان ادامداردىڭ بارلىعى قالاي بولعانىن بىلەدى. بىراق ايتۋعا قورقادى. سەبەبى تۇرمەدە بارلىعىن ازاپتاعان.

– ەكى-ءۇش بالا مەنىڭ باۋىرىما قارسى كۋالىك بەرىپ، شىعىپ كەتكەن. مەن كەيىن سول جىگىتتەردىڭ بىرازىمەن سويلەستىم. ولار «ءبىز جالا جاۋىپ سوتتالعىمىز كەلمەدى، سول ءۇشىن وسىندايعا باردىق» دەدى. ولاردى مەنىڭ باۋىرىم تانىمايدى دا. ولار 20-30 جاستا. مەنىڭ باۋىرىم 50 جاستا. نەگىزى قاسىندا وتىرعان جىگىتتەر بارلىعىن بىلەدى. بىراق ولار ايتۋعا قورقادى. ول جەردە تاياق جەمەگەن ادام جوق، بارلىعى تاياق جەگەن. قاتتى سوققىدان 25-30 جاستاعى جىگىتتەر بۇتتارىنا ءسيىپ قويعان.سونداي ادامدار بولعان، – دەيدى ول. 

باۋىرجان الياسقاروۆ تاكسي بولىپ جۇمىس ىستەگەن. بالا-شاعاسىمەن بىرگە الماتىدا پاتەر جالداپ تۇرعان. قاڭتار وقيعاسى كەزىندە تالدىقورعانعا اپكەسىن اۋرۋحاناعا قاراتۋعا الىپ بارعان. سول جەردە بەيبىت ميتينگكە قاتىسىپ، سىنىپتاس، دوستارىنا سمس حات جولداپ، بەيبىت ميتينگكە شاقىرعان. جومارت الياسقاروۆتىڭ ايتۋىنشا، باۋىرىنىڭ جىبەرگەن اۋديو حابارلاماسىنا ساراپتاما جاسالعان جانە «داۋىستا اگرەسسيا جوق» دەگەن قورىتىندى شىعارىلعان.

قازىر باۋىرجان الياسقاروۆتىڭ ۇستىنەن «جاپپاي تارتىپسىزدىككە قاتىسۋ» جانە «جاپپاي تارتىپسىزدىك ۇيىمداستىرۋ» باپتارى بويىنشا ايىپ تاعىلعان. جومارت الياسقاروۆتىڭ سوزىنشە، باۋىرى تالدىقورعاندا قاڭتار وقيعاسى بويىنشا قاماۋدا وتىرعان جالعىز ادام.