Almatı oblısınıñ bwrınğı äkimi Qanat Bozımbaev Almatı oblısı policiya departamentiniñ eks-basşısı Serik Küdebaevtıñ sotında jauap berdi. Ol kuälik etken uaqıtta zaldan jurnalisterdi şığarıp jiberdi. 

23 qañtarda Taldıqorğan qalasında ötken sot otırısında Qanat Bozımbaev Qañtar oqiğası kezinde oblıstıñ basşısı retinde aymaqtıq ştabtıñ basşısı bolğanın, osığan baylanıstı jauabında «qwpiya» qwjattar jöninde aytatının alğa tartıp, zaldan BAQ ökilderin şığarıp jiberuin swradı.

– Men ötiniş bildirgim keledi. Men bıltır qañtarda Almatı oblısınıñ äkimi qızmetin atqardım. Sol uaqıtta aymaqtıq jedel ştabtıñ basşısı boldım. Ştab jwmısı men hattamalarınıñ basım böligi «asa qwpiya» statusına ie. Sol sebepti sot otırısın jabıq jağdayda, BAQ ökilderiniñ qatısuınsız ötkizudi swraymın, – dedi Bozımbaev.

 Onıñ bwl ötinişin prokuror da qoldap, jurnalisterdi zaldan şığarudı quattadı. Küdebaevtıñ advokattarı ötinişke qarsılıq bildirdi. Olar bettestiru kezindegi Bozımbaevtıñ jauaptarı is materialdarında twrğanın alğa tarttı. Osıdan keyin sud'ya Bozımbaevtan «siz jurnalisterdiñ öziñizdi tüsirgenin qalaysız ba?» dep swradı. Ol «joq» dep jauap bergennen keyin, BAQ ökilderi zaldan şığarıldı.

Qanat Bozımbaev sottan keyin de jurnalister swrağına jauap bermedi.

– Swraqtar boldı, men soğan jauap berdim. (Sizderdiñ – red) eşqanday swraqtarıñızğa jauap bermeymin. Sot jürip jatır. Eger men jauap bersem, bireulerdiñ qwqığın bwzamın, – dep qısqa qayırdı eks-äkim.

Ol qazir ne istep jürgenine, qayda twratınına da jauap bermeytinin ayttı.

Qanat Bozımbaev Qandı Qañtar oqiğası kezinde Taldıqorğan qalasınıñ ortalıq alañında halıqtı balağattap el esinde qalğan. Sol uaqıtta onıñ jinalğan halıqqa «tıñda, eb...» dep aytıp jatqan videosı äleumettik jelide tarağan.

Serik Küdebaevtıñ üstinen Qañtar oqiğası kezindegi is-äreketine baylanıstı QR QK 370 babınıñ 4 böliginiñ 1 tarmağı «auır zardaptarğa äkelip soqqan qızmettegi äreketsizdik» boyınşa qılmıstıq is qozğalğan.