الماتى وبلىسىنىڭ بۇرىنعى اكىمى قانات بوزىمباەۆ الماتى وبلىسى پوليتسيا دەپارتامەنتىنىڭ ەكس-باسشىسى سەرىك كۇدەباەۆتىڭ سوتىندا جاۋاپ بەردى. ول كۋالىك ەتكەن ۋاقىتتا زالدان جۋرناليستەردى شىعارىپ جىبەردى. 

23 قاڭتاردا تالدىقورعان قالاسىندا وتكەن سوت وتىرىسىندا قانات بوزىمباەۆ قاڭتار وقيعاسى كەزىندە وبلىستىڭ باسشىسى رەتىندە ايماقتىق شتابتىڭ باسشىسى بولعانىن، وسىعان بايلانىستى جاۋابىندا «قۇپيا» قۇجاتتار جونىندە ايتاتىنىن العا تارتىپ، زالدان باق وكىلدەرىن شىعارىپ جىبەرۋىن سۇرادى.

– مەن ءوتىنىش بىلدىرگىم كەلەدى. مەن بىلتىر قاڭتاردا الماتى وبلىسىنىڭ اكىمى قىزمەتىن اتقاردىم. سول ۋاقىتتا ايماقتىق جەدەل شتابتىڭ باسشىسى بولدىم. شتاب جۇمىسى مەن حاتتامالارىنىڭ باسىم بولىگى «اسا قۇپيا» ستاتۋسىنا يە. سول سەبەپتى سوت وتىرىسىن جابىق جاعدايدا، باق وكىلدەرىنىڭ قاتىسۋىنسىز وتكىزۋدى سۇرايمىن، – دەدى بوزىمباەۆ.

 ونىڭ بۇل ءوتىنىشىن پروكۋرور دا قولداپ، جۋرناليستەردى زالدان شىعارۋدى قۋاتتادى. كۇدەباەۆتىڭ ادۆوكاتتارى وتىنىشكە قارسىلىق ءبىلدىردى. ولار بەتتەستىرۋ كەزىندەگى بوزىمباەۆتىڭ جاۋاپتارى ءىس ماتەريالدارىندا تۇرعانىن العا تارتتى. وسىدان كەيىن سۋديا بوزىمباەۆتان «ءسىز جۋرناليستەردىڭ ءوزىڭىزدى تۇسىرگەنىن قالايسىز با؟» دەپ سۇرادى. ول «جوق» دەپ جاۋاپ بەرگەننەن كەيىن، باق وكىلدەرى زالدان شىعارىلدى.

قانات بوزىمباەۆ سوتتان كەيىن دە جۋرناليستەر سۇراعىنا جاۋاپ بەرمەدى.

– سۇراقتار بولدى، مەن سوعان جاۋاپ بەردىم. (سىزدەردىڭ – رەد) ەشقانداي سۇراقتارىڭىزعا جاۋاپ بەرمەيمىن. سوت ءجۇرىپ جاتىر. ەگەر مەن جاۋاپ بەرسەم، بىرەۋلەردىڭ قۇقىعىن بۇزامىن، – دەپ قىسقا قايىردى ەكس-اكىم.

ول قازىر نە ىستەپ جۇرگەنىنە، قايدا تۇراتىنىنا دا جاۋاپ بەرمەيتىنىن ايتتى.

قانات بوزىمباەۆ قاندى قاڭتار وقيعاسى كەزىندە تالدىقورعان قالاسىنىڭ ورتالىق الاڭىندا حالىقتى بالاعاتتاپ ەل ەسىندە قالعان. سول ۋاقىتتا ونىڭ جينالعان حالىققا «تىڭدا، ەب...» دەپ ايتىپ جاتقان ۆيدەوسى الەۋمەتتىك جەلىدە تاراعان.

سەرىك كۇدەباەۆتىڭ ۇستىنەن قاڭتار وقيعاسى كەزىندەگى ءىس-ارەكەتىنە بايلانىستى قر قك 370 بابىنىڭ 4 بولىگىنىڭ 1 تارماعى «اۋىر زارداپتارعا اكەلىپ سوققان قىزمەتتەگى ارەكەتسىزدىك» بويىنشا قىلمىستىق ءىس قوزعالعان.