Foto: uralskweek.kz

16 qañtarda Batıs Qazaqstan oblısı Börli audanı Aqsay qalasındağı Qaraşığanaq ken ornında KKS-Sicim jauapkerşiligi şekteuli seriktestiginiñ jwmısşıları tañğı sağat altıdan beri jalaqını elu payız köbeytudi talap etip, jwmısqa şığudan bas tarttı. Bwl turalı Ortalıq Aziya jañalıqtar qızmeti jazdı.

Narazılıq akciyası äli jalğasıp jatır. Bwl turalı Azattıqqa jwmısşılar habarladı.

Atı-jönin jariyalasa jwmıstan şığıp qalamın dep qauiptengen jwmısşılardıñ biri qazir birneşe jüz jwmısşı birin-biri kezek almastırıp ereuilde twrğanın ayttı. Olar bwl mäsele bıltır da köterilgenin, biraq ol kezde jalaqığa on payız üsteme qosqanın aytadı.

- Biz tañğı sağat altığa jaqın jwmısqa alıp kele jatqan avtobustan tüstik te, kompaniya aldında işke kirmesten narazılıqtı bastap kettik. Jalaqımız tükke jetpeydi, özimiz birneşe apta auısımmen isteymiz. Biri 14 kün, endi biri üş apta jwmısta jür. Jalaqımızğa 50 payız qossın degen ğana talabımız bar, basqa eşteñe swramaymız, - deydi jwmısşı.

Atı-jönin atamaudı jön körgen tağı bir jwmısşı narazılıqqa bügingi auısımda jwmıs isteytinderdiñ barlığı şıqqanın ayttı. Kompaniya jwmısı qazir toqtap twr. Olardıñ jalaqısı qızmeti men kategoriyasına baylanıstı ärtürli – ortaşa eseppen aylıq kölemi 180 mıñ teñge men 250 mıñ teñge şamasında.

Är jwmısşınıñ 1 sağatı 824 teñgeden esepteledi.

Osı uaqıtqa deyin jwmısşılarğa kompaniya basşılığınıñ ökili, aumaqtıq memlekettik eñbek inspektorı, Aqsay qalasınıñ prokurorı jäne qala äkiminiñ orınbasarı barğan. Olar jwmısşılarğa jalaqığa aqpan ayınan bastap 20 payız üsteme qosılatının aytqan.

Äleumettik jelide tarağan videoda jwmısşılarmen kezdesken kompaniyanıñ kadrlar böliminiñ menedjeri wjımdıq şartqa säykes, jalaqı aqpanda 20 payız ösetinin, onımen jwmısşılar aldın ala tanısqanın, biraq 50 payız köbeytudi talap etu zañsız ekenin aytqan kezde jwmısşılardıñ "50, 50!" dep ayqayğa basqanı körindi. Jwmısşılardıñ azıq-tüliktiñ qımbattap bara jatqanın aytıp, jalaqını qañtardan bastap köterudi talap etkeni de estiledi.

– Bizben söylesuge kelgen şeneunikter kompaniya keñsesine kirip ketti. Söylesip jatır. Talabımızdı orındağanşa twramız. Äzirge aynalada tek eki patrul' policiyası twr, bir uçaskelik policiya inspektorı da bar, – dedi jwmısşı.

Jwmısşılar kompaniyanıñ negizgi keñsesi – Atıraudağı Qarabatannan SICIM kompaniyasınıñ basşılığı kele jatır, şeşimdi sol şığaradı degen habar tarap jatqanın, biraq bwl qanşalıqtı ras aqparat belgisiz ekenin jetkizdi.

KKS-Sicim – italiyalıq SICIM jäne qazaqstandıq KazKomServis kompaniyalarınıñ birlesken mekemesi. Karachaganak Petroleum Operating B.V. kompaniyasınıñ merdigeri KKS-Sicim kompaniyası gaz jäne mwnay magistraldı qwbır jelisin salumen aynalısadı.