بقو. KKS-Sicim جۇمىسشىلارى جالاقى ءوسىرۋدى تالاپ ەتىپ ەرەۋىلگە شىقتى

نارازىلىق اكتسياسى ءالى جالعاسىپ جاتىر. بۇل تۋرالى ازاتتىققا جۇمىسشىلار حابارلادى.

اتى-ءجونىن جاريالاسا جۇمىستان شىعىپ قالامىن دەپ قاۋىپتەنگەن جۇمىسشىلاردىڭ ءبىرى قازىر بىرنەشە ءجۇز جۇمىسشى ءبىرىن-ءبىرى كەزەك الماستىرىپ ەرەۋىلدە تۇرعانىن ايتتى. ولار بۇل ماسەلە بىلتىر دا كوتەرىلگەنىن، بىراق ول كەزدە جالاقىعا ون پايىز ۇستەمە قوسقانىن ايتادى.

- ءبىز تاڭعى ساعات التىعا جاقىن جۇمىسقا الىپ كەلە جاتقان اۆتوبۋستان تۇستىك تە، كومپانيا الدىندا ىشكە كىرمەستەن نارازىلىقتى باستاپ كەتتىك. جالاقىمىز تۇككە جەتپەيدى، ءوزىمىز بىرنەشە اپتا اۋىسىممەن ىستەيمىز. ءبىرى 14 كۇن، ەندى ءبىرى ءۇش اپتا جۇمىستا ءجۇر. جالاقىمىزعا 50 پايىز قوسسىن دەگەن عانا تالابىمىز بار، باسقا ەشتەڭە سۇرامايمىز، - دەيدى جۇمىسشى.

اتى-ءجونىن اتاماۋدى ءجون كورگەن تاعى ءبىر جۇمىسشى نارازىلىققا بۇگىنگى اۋىسىمدا جۇمىس ىستەيتىندەردىڭ بارلىعى شىققانىن ايتتى. كومپانيا جۇمىسى قازىر توقتاپ تۇر. ولاردىڭ جالاقىسى قىزمەتى مەن كاتەگورياسىنا بايلانىستى ءارتۇرلى – ورتاشا ەسەپپەن ايلىق كولەمى 180 مىڭ تەڭگە مەن 250 مىڭ تەڭگە شاماسىندا.

ءار جۇمىسشىنىڭ 1 ساعاتى 824 تەڭگەدەن ەسەپتەلەدى.

وسى ۋاقىتقا دەيىن جۇمىسشىلارعا كومپانيا باسشىلىعىنىڭ وكىلى، اۋماقتىق مەملەكەتتىك ەڭبەك ينسپەكتورى، اقساي قالاسىنىڭ پروكۋرورى جانە قالا اكىمىنىڭ ورىنباسارى بارعان. ولار جۇمىسشىلارعا جالاقىعا اقپان ايىنان باستاپ 20 پايىز ۇستەمە قوسىلاتىنىن ايتقان.

الەۋمەتتىك جەلىدە تاراعان ۆيدەودا جۇمىسشىلارمەن كەزدەسكەن كومپانيانىڭ كادرلار ءبولىمىنىڭ مەنەدجەرى ۇجىمدىق شارتقا سايكەس، جالاقى اقپاندا 20 پايىز وسەتىنىن، ونىمەن جۇمىسشىلار الدىن الا تانىسقانىن، بىراق 50 پايىز كوبەيتۋدى تالاپ ەتۋ زاڭسىز ەكەنىن ايتقان كەزدە جۇمىسشىلاردىڭ "50, 50!" دەپ ايقايعا باسقانى كورىندى. جۇمىسشىلاردىڭ ازىق-تۇلىكتىڭ قىمباتتاپ بارا جاتقانىن ايتىپ، جالاقىنى قاڭتاردان باستاپ كوتەرۋدى تالاپ ەتكەنى دە ەستىلەدى.

– بىزبەن سويلەسۋگە كەلگەن شەنەۋنىكتەر كومپانيا كەڭسەسىنە كىرىپ كەتتى. سويلەسىپ جاتىر. تالابىمىزدى ورىنداعانشا تۇرامىز. ازىرگە اينالادا تەك ەكى پاترۋل پوليتسياسى تۇر، ءبىر ۋچاسكەلىك پوليتسيا ينسپەكتورى دا بار، – دەدى جۇمىسشى.

جۇمىسشىلار كومپانيانىڭ نەگىزگى كەڭسەسى – اتىراۋداعى قاراباتاننان SICIM كومپانياسىنىڭ باسشىلىعى كەلە جاتىر، شەشىمدى سول شىعارادى دەگەن حابار تاراپ جاتقانىن، بىراق بۇل قانشالىقتى راس اقپارات بەلگىسىز ەكەنىن جەتكىزدى.

KKS-Sicim – يتاليالىق SICIM جانە قازاقستاندىق كازكومسەرۆيس كومپانيالارىنىڭ بىرلەسكەن مەكەمەسى. Karachaganak Petroleum Operating B.V. كومپانياسىنىڭ مەردىگەرى KKS-Sicim كومپانياسى گاز جانە مۇناي ماگيسترالدى قۇبىر جەلىسىن سالۋمەن اينالىسادى.