Foto: ulysmedia.kz
Almatı policiyası jurnalist Dinara Egeubaevanıñ "köligin örtedi" jäne Elmedia redakciyasınıñ "terezesin sındırdı" degen küdikpen bes jasöspirim wstalğanın habarladı. Bwl turalı Ortalıq Aziya jañalıqtar qızmeti jazdı.

"Jedel bölim qızmetkerleri birneşe qılmıs jasadı degen küdikpen 2005, 2006 jäne 2007 jıldarı tuğan bes jasöspirimdi wstadı. Olardıñ jauabına qarağanda, eki tapsırıstı da olar internet arqılı belgisiz bireuden alğan. Tapsırıs beruşi aqısın da däl solay [internet arqılı] tölegen" dep jazılğan policiyanıñ jeksenbi küngi habarlamasında.

Policiyanıñ aytuınşa, qazirgi kezde küdiktilerge bwltartpas şarasın qoldanu mäselesi qaralıp jatır. Tergeu jalğasadı.

Almatı policiyası sonımen birge "tapsırıs beruşiniñ kim ekenin anıqtap, onı wstauğa bağıttalğan keşendi is-şara jürgizilip jatqanın" da ayttı.

"Barlıq derek boyınşa qosımşa aqparat tergeu tolıq ayaqtalğannan keyin jariyalanadı. Tergeu İİM men Almatı qalalıq policiya departamentiniñ baqılauında" dep jazılğan habarlamada.

14 qañtarğa qarağan tüni jurnalist Dinara Egeubaeva belgisiz bireulerdiñ köliginiñ artqı terezesin sındırıp, kirpiş laqtırğanın, köligine ot qoyğanın habarlağan.

Ol oqiğanı "özine jasalğan qastandıq" dep bağalağan edi.

Egeubaevanı qoldağan belsendiler oqiğanı onıñ käsibi qızmeti men sayasi ambiciyasımen baylanıstırğan.

İİM bir kün bwrın birıñğay reestrde "bötenniñ mülkin joyu nemese büldiru" babı boyınşa is tirkelgenin habarlağan.

Üş apta bwrın Egeubaeva özge belsendilermen birge "Altınşı Qañtar" ("6 qañtar") blogı qwrılğanın jäne birmandattı okrug boyınşa kezekten tıs mäjilis saylauına (merzimi äzirge belgilengen joq) özin kandidat retinde wsınuğa dayın ekenin aytqan.

Eki kün bwrın Elmedia redakciyası keñsesine bıltırğı jıldıñ qazanınan beri altınşı ret "şabuıl jasalğanın" habarlap, Elmedia jobasınıñ jetekşisi Güljan Erğalieva oqiğanı "diversiya" dep atağan edi. Redakciya ökilderi "şabuıldauşılar Elmedia'nıñ jwmısın toqtatqısı keledi" dep mälimdegen.

Policiya habarlamasında bes küdiktiniñ naqtı qay şabuılğa qatıstı wstalğanın aytpağan, biraq "aldıñğı esik turalı" aytqanına qarağanda eki kün bwrınğı şabuıldı meñzegen tärizdi.

Bıltır qaraşada policiya Elmedia redakciyası keñsesine "şabuıldağan" eki adam wstaldı, ekeui de 18 jasta dep mälimdegen edi. Ol kezde küdiktilerge "Wsaq bwzaqılıq" babı boyınşa äkimşilik is qozğalğanı habarlanğan. Azattıq sud.kz saytınan is turalı aqparat tappadı.

Qazaqstanda jurnalister käsibi qızmetine baylanıstı tosqauıl-kedergilerge jii wşıraydı. "Şekarasız tilşiler" halıqaralıq wyımınıñ "Söz bostandığı indeksinde" Qazaqstan 180 eldiñ arasında 122-orında twr. Elde söz bostandığınıñ ahualı kürdeli dep bağalanadı.