پوليتسيا جۋرناليست دينارا ەگەۋباەۆانىڭ "كولىگىن ورتەپ", Elmedia كەڭسەسىنىڭ "تەرەزەسىن سىندىرعان" بەس كۇدىكتىنى ۇستاعانىن حابارلادى

"جەدەل ءبولىم قىزمەتكەرلەرى بىرنەشە قىلمىس جاسادى دەگەن كۇدىكپەن 2005, 2006 جانە 2007 جىلدارى تۋعان بەس ءجاسوسپىرىمدى ۇستادى. ولاردىڭ جاۋابىنا قاراعاندا، ەكى تاپسىرىستى دا ولار ينتەرنەت ارقىلى بەلگىسىز بىرەۋدەن العان. تاپسىرىس بەرۋشى اقىسىن دا ءدال سولاي [ينتەرنەت ارقىلى] تولەگەن" دەپ جازىلعان پوليتسيانىڭ جەكسەنبى كۇنگى حابارلاماسىندا.

پوليتسيانىڭ ايتۋىنشا، قازىرگى كەزدە كۇدىكتىلەرگە بۇلتارتپاس شاراسىن قولدانۋ ماسەلەسى قارالىپ جاتىر. تەرگەۋ جالعاسادى.

الماتى پوليتسياسى سونىمەن بىرگە "تاپسىرىس بەرۋشىنىڭ كىم ەكەنىن انىقتاپ، ونى ۇستاۋعا باعىتتالعان كەشەندى ءىس-شارا جۇرگىزىلىپ جاتقانىن" دا ايتتى.

"بارلىق دەرەك بويىنشا قوسىمشا اقپارات تەرگەۋ تولىق اياقتالعاننان كەيىن جاريالانادى. تەرگەۋ ءىىم مەن الماتى قالالىق پوليتسيا دەپارتامەنتىنىڭ باقىلاۋىندا" دەپ جازىلعان حابارلامادا.

14 قاڭتارعا قاراعان ءتۇنى جۋرناليست دينارا ەگەۋباەۆا بەلگىسىز بىرەۋلەردىڭ كولىگىنىڭ ارتقى تەرەزەسىن سىندىرىپ، كىرپىش لاقتىرعانىن، كولىگىنە وت قويعانىن حابارلاعان.

ول وقيعانى "وزىنە جاسالعان قاستاندىق" دەپ باعالاعان ەدى.

ەگەۋباەۆانى قولداعان بەلسەندىلەر وقيعانى ونىڭ كاسىبي قىزمەتى مەن ساياسي امبيتسياسىمەن بايلانىستىرعان.

ءىىم ءبىر كۇن بۇرىن بىرىڭعاي رەەستردە "بوتەننىڭ مۇلكىن جويۋ نەمەسە ءبۇلدىرۋ" بابى بويىنشا ءىس تىركەلگەنىن حابارلاعان.

ءۇش اپتا بۇرىن ەگەۋباەۆا وزگە بەلسەندىلەرمەن بىرگە "التىنشى قاڭتار" ("6 قاڭتار") بلوگى قۇرىلعانىن جانە ءبىرمانداتتى وكرۋگ بويىنشا كەزەكتەن تىس ءماجىلىس سايلاۋىنا (مەرزىمى ازىرگە بەلگىلەنگەن جوق) ءوزىن كانديدات رەتىندە ۇسىنۋعا دايىن ەكەنىن ايتقان.

ەكى كۇن بۇرىن Elmedia رەداكتسياسى كەڭسەسىنە بىلتىرعى جىلدىڭ قازانىنان بەرى التىنشى رەت "شابۋىل جاسالعانىن" حابارلاپ، Elmedia جوباسىنىڭ جەتەكشىسى گۇلجان ەرعاليەۆا وقيعانى "ديۆەرسيا" دەپ اتاعان ەدى. رەداكتسيا وكىلدەرى "شابۋىلداۋشىلار Elmedia'نىڭ جۇمىسىن توقتاتقىسى كەلەدى" دەپ مالىمدەگەن.

پوليتسيا حابارلاماسىندا بەس كۇدىكتىنىڭ ناقتى قاي شابۋىلعا قاتىستى ۇستالعانىن ايتپاعان، بىراق "الدىڭعى ەسىك تۋرالى" ايتقانىنا قاراعاندا ەكى كۇن بۇرىنعى شابۋىلدى مەڭزەگەن ءتارىزدى.

بىلتىر قاراشادا پوليتسيا Elmedia رەداكتسياسى كەڭسەسىنە "شابۋىلداعان" ەكى ادام ۇستالدى، ەكەۋى دە 18 جاستا دەپ مالىمدەگەن ەدى. ول كەزدە كۇدىكتىلەرگە "ۇساق بۇزاقىلىق" بابى بويىنشا اكىمشىلىك ءىس قوزعالعانى حابارلانعان. ازاتتىق sud.kz سايتىنان ءىس تۋرالى اقپارات تاپپادى.

قازاقستاندا جۋرناليستەر كاسىبي قىزمەتىنە بايلانىستى توسقاۋىل-كەدەرگىلەرگە ءجيى ۇشىرايدى. "شەكاراسىز تىلشىلەر" حالىقارالىق ۇيىمىنىڭ ء"سوز بوستاندىعى يندەكسىندە" قازاقستان 180 ەلدىڭ اراسىندا 122-ورىندا تۇر. ەلدە ءسوز بوستاندىعىنىڭ احۋالى كۇردەلى دەپ باعالانادى.