Qaza tapqandardıñ tuıstarı alañda bir ğana BTR-dıñ bolğanına kümänmen qaraydı

Tarazda Qañtar oqiğasına baylanıstı ayıptalğan toğız adamnıñ sotı jalğasuda. İs boyınşa qılmıstıq jauapkerşilikke tartılğan Rays Rısbekov, Erjan Bayjanov, Nwrswltan Quatbaev, Toqtar Oşaqbay jäne Isatay Donbaev Qañtar oqiğası kezinde oqqa wşıp, qaza tapqan.

28 jeltoqsanda ötken sot otırısında sud'ya Bağdat Törebekwlı bir ğana kuäger Aynwr Jwmadilovanı tıñdadı. Ol halıqqa oq atılğan ortalıq alañğa jaqın ornalasqan üylerdiñ birinde twratının, Qañtar oqiğası kezinde Töle bi köşesinde bolğan jağdaydı üyiniñ terezesinen videoğa tüsirgenin ayttı. Onıñ sözinşe, 6 qañtarda köşege beybit halıq şıqqan. Eşqaysınıñ qolında qaru bolmağan. Äskerilerdiñ BTR-dan oq jaudırğanın körmegen. Biraq äskeri tehnika ötkennen keyin köşede adamdardıñ ölip jatqanın körgen.

– Töle bi köşesimen alañğa qaray ketip bara jatqan halıqtıñ qolında eşqanday qaru bolğan joq. Jalau wstağan, «Alğa, Qazaqstan» dep wrandatqan adamdardı kördim. Arasında mas adamdar da boldı. BTR-dan oq atqanın körgen joqpın. Biraq BTR ötip ketken soñ köşede ölgen adamdar jattı, – dedi Jwmadilova.

Aynwr Jwmadilovanıñ aytuınşa, ol 6 qañtarda jedel järdem şaqırğan. Biraq olar «bizge ol jerge baruğa bwyrıq kelgen joq» dep jauap bergen. Oqqa wşıp, qaza tapqandardıñ denesin jedel järdem bir kün ötkennen keyin biraq alıp ketken.

– Jedel järdem qañtardıñ 7-i küni tüsten keyin sağat 15:00 şamasında kelip, qaza tapqandardıñ denesin alıp ketti. Olardı qara paketterge salıp alıp ketip jattı. Olardıñ qaza tapqanın sodan bildim, – dedi kuäger.

İs boyınşa küdikti dep tanılğan Nwrswltan Quatbaevtıñ äkesi Baqıtjan Şıñğısbekov ötken sot otırısında jauap bergen äskeri ağa serjant Sekerbekovtıñ jauabı men bügingi kuägerdiñ jauabı bir-birine qarama-qayşı ekenin aytadı.

– Sekerbekov polkovnik Jagipbarovtıñ bwyrığımen 91 oq atqanın ayttı. Onıñ jartısın aspanğa, jartısın jerge attım dedi. Biraq biz videodan kördik, ol jerde onday närse bolmağan. Tikeley balalardı qırıp ötken... Sekerbekov «Jambıl» qonaq üyiniñ aldına kelgenimde qız-jigitter şep jasap, BTR-dıñ jüruine kedergi jasadı dedi. Bügingi kuäger Aynwr Jwmadilova köşede bolğan halıq BTR-ğa eşqanday kedergi keltirmegenin, eşkimniñ qolında eşqanday tas, qaru bolmağanın aytıp otır. Bwl jerde qarama-qayşılıq bar. Bwlar barlığın özderi qoldan jasap qoyğan, – deydi Şıñğısbekov.

İs boyınşa Qañtar oqiğası kezinde alañda bir ğana BTR boldı delingen. Biraq qaza tapqandardıñ tuıstarı oğan kümänmen qaraydı. Olardıñ sözinşe, videoda bir minut ayırmaşılığımen eki BTR bir-birine qarama qarsı bağıtta ötken.

– Beyne taspanı qarasañız, 22:57 ketkende BTR Töle bi köşesimen alañğa qaray kiredi de qırıp ötedi. Arada bir minut ötkende keri qaray ötedi. Ol BTR alañnıñ arğı basındağı drama teatr jaqqa barıp, bir minuttıñ işinde bwrılıp kele almaydı. Ol jeñil maşina emes. Segiz döñgelekti tehnika ğoy. Bizge kümän keltiretin närse sol uaqıt. Bir minuttıñ işinde BTR alañğa barıp-kele almaydı, – deydi Şıñğısbekov.

Qañtarda oqqa wşıp, qaza tapqan Rays Rısbekov pen Erjan Bayjanovtıñ üstinen QR QK 287 babınıñ 3 tarmağı «qaru-jaraq qwraldarın zañsız iemdenu, tasımaldau, saqtau, alıp jüru» jäne 272 babınıñ 2 tarmağı «jappay tärtipsizdikke qatısu» boyınşa ayıp tağılğan. Ekeuiniñ de qaltasınan oq tabılğan. Tuıstarı «ol oqtardı äskeriler salıp jiberdi» deydi. Nwrswltan Quatbaev, Toqtar Oşaqbay jäne Isatay Donbaev is boyınşa 272 baptıñ 2 tarmağımen küdikti dep tanılğan.

Resmi derek derek boyınşa, Qañtar oqiğası kezinde Tarazda 15 adam qaza tapqan.