قازا تاپقانداردىڭ تۋىستارى الاڭدا ءبىر عانا بتر-دىڭ بولعانىنا كۇمانمەن قارايدى

تارازدا قاڭتار وقيعاسىنا بايلانىستى ايىپتالعان توعىز ادامنىڭ سوتى جالعاسۋدا. ءىس بويىنشا قىلمىستىق جاۋاپكەرشىلىككە تارتىلعان رايس رىسبەكوۆ، ەرجان بايجانوۆ، نۇرسۇلتان قۋاتباەۆ، توقتار وشاقباي جانە يساتاي دونباەۆ قاڭتار وقيعاسى كەزىندە وققا ۇشىپ، قازا تاپقان.

28 جەلتوقساندا وتكەن سوت وتىرىسىندا سۋديا باعدات تورەبەكۇلى ءبىر عانا كۋاگەر اينۇر ءجۇمادىلوۆانى تىڭدادى. ول حالىققا وق اتىلعان ورتالىق الاڭعا جاقىن ورنالاسقان ۇيلەردىڭ بىرىندە تۇراتىنىن، قاڭتار وقيعاسى كەزىندە تولە بي كوشەسىندە بولعان جاعدايدى ءۇيىنىڭ تەرەزەسىنەن ۆيدەوعا تۇسىرگەنىن ايتتى. ونىڭ سوزىنشە، 6 قاڭتاردا كوشەگە بەيبىت حالىق شىققان. ەشقايسىنىڭ قولىندا قارۋ بولماعان. اسكەريلەردىڭ بتر-دان وق جاۋدىرعانىن كورمەگەن. بىراق اسكەري تەحنيكا وتكەننەن كەيىن كوشەدە ادامداردىڭ ءولىپ جاتقانىن كورگەن.

– تولە بي كوشەسىمەن الاڭعا قاراي كەتىپ بارا جاتقان حالىقتىڭ قولىندا ەشقانداي قارۋ بولعان جوق. جالاۋ ۇستاعان، «العا، قازاقستان» دەپ ۇرانداتقان ادامداردى كوردىم. اراسىندا ماس ادامدار دا بولدى. بتر-دان وق اتقانىن كورگەن جوقپىن. بىراق بتر ءوتىپ كەتكەن سوڭ كوشەدە ولگەن ادامدار جاتتى، – دەدى ءجۇمادىلوۆا.

اينۇر ءجۇمادىلوۆانىڭ ايتۋىنشا، ول 6 قاڭتاردا جەدەل جاردەم شاقىرعان. بىراق ولار «بىزگە ول جەرگە بارۋعا بۇيرىق كەلگەن جوق» دەپ جاۋاپ بەرگەن. وققا ۇشىپ، قازا تاپقانداردىڭ دەنەسىن جەدەل جاردەم ءبىر كۇن وتكەننەن كەيىن بىراق الىپ كەتكەن.

– جەدەل جاردەم قاڭتاردىڭ 7-ءى كۇنى تۇستەن كەيىن ساعات 15:00 شاماسىندا كەلىپ، قازا تاپقانداردىڭ دەنەسىن الىپ كەتتى. ولاردى قارا پاكەتتەرگە سالىپ الىپ كەتىپ جاتتى. ولاردىڭ قازا تاپقانىن سودان ءبىلدىم، – دەدى كۋاگەر.

ءىس بويىنشا كۇدىكتى دەپ تانىلعان نۇرسۇلتان قۋاتباەۆتىڭ اكەسى باقىتجان شىڭعىسبەكوۆ وتكەن سوت وتىرىسىندا جاۋاپ بەرگەن اسكەري اعا سەرجانت سەكەربەكوۆتىڭ جاۋابى مەن بۇگىنگى كۋاگەردىڭ جاۋابى ءبىر-بىرىنە قاراما-قايشى ەكەنىن ايتادى.

– سەكەربەكوۆ پولكوۆنيك جاگيپباروۆتىڭ بۇيرىعىمەن 91 وق اتقانىن ايتتى. ونىڭ جارتىسىن اسپانعا، جارتىسىن جەرگە اتتىم دەدى. بىراق ءبىز ۆيدەودان كوردىك، ول جەردە ونداي نارسە بولماعان. تىكەلەي بالالاردى قىرىپ وتكەن... سەكەربەكوۆ «جامبىل» قوناق ءۇيىنىڭ الدىنا كەلگەنىمدە قىز-جىگىتتەر شەپ جاساپ، بتر-دىڭ جۇرۋىنە كەدەرگى جاسادى دەدى. بۇگىنگى كۋاگەر اينۇر ءجۇمادىلوۆا كوشەدە بولعان حالىق بتر-عا ەشقانداي كەدەرگى كەلتىرمەگەنىن، ەشكىمنىڭ قولىندا ەشقانداي تاس، قارۋ بولماعانىن ايتىپ وتىر. بۇل جەردە قاراما-قايشىلىق بار. بۇلار بارلىعىن وزدەرى قولدان جاساپ قويعان، – دەيدى شىڭعىسبەكوۆ.

ءىس بويىنشا قاڭتار وقيعاسى كەزىندە الاڭدا ءبىر عانا بتر بولدى دەلىنگەن. بىراق قازا تاپقانداردىڭ تۋىستارى وعان كۇمانمەن قارايدى. ولاردىڭ سوزىنشە، ۆيدەودا ءبىر مينۋت ايىرماشىلىعىمەن ەكى بتر ءبىر-بىرىنە قاراما قارسى باعىتتا وتكەن.

– بەينە تاسپانى قاراساڭىز، 22:57 كەتكەندە بتر تولە بي كوشەسىمەن الاڭعا قاراي كىرەدى دە قىرىپ وتەدى. ارادا ءبىر مينۋت وتكەندە كەرى قاراي وتەدى. ول بتر الاڭنىڭ ارعى باسىنداعى دراما تەاتر جاققا بارىپ، ءبىر مينۋتتىڭ ىشىندە بۇرىلىپ كەلە المايدى. ول جەڭىل ماشينا ەمەس. سەگىز دوڭگەلەكتى تەحنيكا عوي. بىزگە كۇمان كەلتىرەتىن نارسە سول ۋاقىت. ءبىر مينۋتتىڭ ىشىندە بتر الاڭعا بارىپ-كەلە المايدى، – دەيدى شىڭعىسبەكوۆ.

قاڭتاردا وققا ۇشىپ، قازا تاپقان رايس رىسبەكوۆ پەن ەرجان بايجانوۆتىڭ ۇستىنەن قر قك 287 بابىنىڭ 3 تارماعى «قارۋ-جاراق قۇرالدارىن زاڭسىز يەمدەنۋ، تاسىمالداۋ، ساقتاۋ، الىپ ءجۇرۋ» جانە 272 بابىنىڭ 2 تارماعى «جاپپاي تارتىپسىزدىككە قاتىسۋ» بويىنشا ايىپ تاعىلعان. ەكەۋىنىڭ دە قالتاسىنان وق تابىلعان. تۋىستارى «ول وقتاردى اسكەريلەر سالىپ جىبەردى» دەيدى. نۇرسۇلتان قۋاتباەۆ، توقتار وشاقباي جانە يساتاي دونباەۆ ءىس بويىنشا 272 باپتىڭ 2 تارماعىمەن كۇدىكتى دەپ تانىلعان.

رەسمي دەرەك دەرەك بويىنشا، قاڭتار وقيعاسى كەزىندە تارازدا 15 ادام قازا تاپقان.