Foto: Aşıq derekközden alındı

20 qaraşağa belgilengen kezekten tıs prezident saylauı qarsañında oppoziciya belsendileri jariyalağan beybit mitingige baylanıstı Qazaqstannıñ türli öñirinde belsendilerdiñ wstalıp jatqanı habarlandı. Bwl turalı Ortalıq Aziya jañalıqtar qızmeti jazdı.

Feysbuktağı "Belsendiler ekstremist emes" tobınıñ soñğı mälimetinşe,Astanada birneşe belsendi wstalıp, keminde beseui qamalğan.

11 qaraşada Astana sotı "Alğa, Qazaqstan" oppoziciyalıq partiyasın qwru jönindegi bastama top ökilderi Venera Janbaeva, Sanduğaş Qañtarbaeva, Mereke Nwğımanov, Marat Jılanbaev, Marat Mwsabaevtı 15 täulikke qamadı. Olarğa "beybit jiın ötkizu tärtibin bwzdı" degen ayıp tağılğan. Belsendilerdiñ qudalanuın baqılaytın top wstau kezinde olarğa "döreki küş qoldanılğanın" habarladı.

Olardı policiya biıl 21 tamızda Europarlament delegaciyasınıñ Qazaqstanğa saparı qarsañında Astanada ötkizgen beybit miting üşin ayıptağan. Olar sol kezde sayasi twtqındardı bosatudı, sayasi qudalaudı doğarudı, barlıq sayasi partiyanı tirkeudi talap etken.

Sud.kz saytında jariyalanğan sot şeşiminde Jılanbaev, Nwğımanov, Mwsabaev, Janbaeva jäne Qañtarbaevanıñ 21 qaraşada Astanada "Cvetoçnıy sad" alañında "rwqsat etilmegen mitingige" qatısqanı jazılğan. Olarğa 488-baptıñ 6-böligi boyınşa ayıp tağılğan. Sotta belsendiler tağılğan ayıptardı moyındamağan. Belsendi Marat Mwsabaev sotta "swraqtarğa jauap bermey, özine toltırılğan hattamanı zañsız dep sanaytının" aytqan.

"Belsendiler ekstremist emes" tobınıñ mälimetinşe, policiya bölimşesinde belsendi Sanduğaş Qañtarbaevanıñ jağdayı naşarlap, jedel järdem şaqırtılğan. Biraq soğan qaramastan sot onı äkimşilik qamauğa jibergen.

Sud.kz saytında tağı bir belsendi Semigül Oşaqbaevanıñ isi qabıldanğanı jöninde aqparat bolğanmen sot şeşimi jariyalanbağan.

"Belsendiler ekstremist emes" tobınıñ mälimetinşe, Öskemende de Marat Baygulin "beybit jiın ötkizu tärtibin bwzğanı üşin" wstalğan. Aqparat anıqtalıp jatır.

Policiya oqiğağa tüsinikteme bermedi.

Osığan deyin "Alğa, Qazaqstan" oppoziciyalıq partiyasın qwru jönindegi bastama top ökilderi 20 qaraşada beybit miting ötkizetinin mälimdegen. Top müşeleri bwğan deyin "ädiletsiz saylaudı ötkizbeudi", sayasi qudalaudı doğarudı, sayasi partiyalardı tirkeudi talap etken.

Bwğan deyin bilik tirkelmegen "Alğa, Qazaqstan" partiyası ökilderiniñ "miting ötkizu turalı ötinişterin" qanağattandırmağan edi. Belsendiler kezekten tıs prezident saylauı, Qañtar oqiğası, sayasi twtqındar mäselesi jöninde pikirlerin aytpaq bolğan.

Halıqaralıq qauımdastıq Qazaqstan biliginen "Beybit jiın ötkizu turalı" zañdı qayta qarap, halıqqa öz oyın erkin aytuğa kedergi keltirmeudi talap etip keledi. Astana eldegi beybit jiındar turalı zañ halıqaralıq talaptarğa say degen uäj aytadı.