كەزەكتەن تىس سايلاۋ. بەلسەندىلەر ۇستالىپ جاتىر

فەيسبۋكتاعى "بەلسەندىلەر ەكسترەميست ەمەس" توبىنىڭ سوڭعى مالىمەتىنشە,استانادا بىرنەشە بەلسەندى ۇستالىپ، كەمىندە بەسەۋى قامالعان.

11 قاراشادا استانا سوتى "العا، قازاقستان" وپپوزيتسيالىق پارتياسىن قۇرۋ جونىندەگى باستاما توپ وكىلدەرى ۆەنەرا جانباەۆا، ساندۋعاش قاڭتارباەۆا، مەرەكە نۇعىمانوۆ، مارات جىلانباەۆ، مارات مۇساباەۆتى 15 تاۋلىككە قامادى. ولارعا "بەيبىت جيىن وتكىزۋ ءتارتىبىن بۇزدى" دەگەن ايىپ تاعىلعان. بەلسەندىلەردىڭ قۋدالانۋىن باقىلايتىن توپ ۇستاۋ كەزىندە ولارعا "دورەكى كۇش قولدانىلعانىن" حابارلادى.

ولاردى پوليتسيا بيىل 21 تامىزدا ەۋروپارلامەنت دەلەگاتسياسىنىڭ قازاقستانعا ساپارى قارساڭىندا استانادا وتكىزگەن بەيبىت ميتينگ ءۇشىن ايىپتاعان. ولار سول كەزدە ساياسي تۇتقىنداردى بوساتۋدى، ساياسي قۋدالاۋدى دوعارۋدى، بارلىق ساياسي پارتيانى تىركەۋدى تالاپ ەتكەن.

Sud.kz سايتىندا جاريالانعان سوت شەشىمىندە جىلانباەۆ، نۇعىمانوۆ، مۇساباەۆ، جانباەۆا جانە قاڭتارباەۆانىڭ 21 قاراشادا استانادا "تسۆەتوچنىي ساد" الاڭىندا "رۇقسات ەتىلمەگەن ميتينگىگە" قاتىسقانى جازىلعان. ولارعا 488-باپتىڭ 6-بولىگى بويىنشا ايىپ تاعىلعان. سوتتا بەلسەندىلەر تاعىلعان ايىپتاردى مويىنداماعان. بەلسەندى مارات مۇساباەۆ سوتتا "سۇراقتارعا جاۋاپ بەرمەي، وزىنە تولتىرىلعان حاتتامانى زاڭسىز دەپ سانايتىنىن" ايتقان.

"بەلسەندىلەر ەكسترەميست ەمەس" توبىنىڭ مالىمەتىنشە، پوليتسيا بولىمشەسىندە بەلسەندى ساندۋعاش قاڭتارباەۆانىڭ جاعدايى ناشارلاپ، جەدەل جاردەم شاقىرتىلعان. بىراق سوعان قاراماستان سوت ونى اكىمشىلىك قاماۋعا جىبەرگەن.

Sud.kz سايتىندا تاعى ءبىر بەلسەندى سەميگۇل وشاقباەۆانىڭ ءىسى قابىلدانعانى جونىندە اقپارات بولعانمەن سوت شەشىمى جاريالانباعان.

"بەلسەندىلەر ەكسترەميست ەمەس" توبىنىڭ مالىمەتىنشە، وسكەمەندە دە مارات بايگۋلين "بەيبىت جيىن وتكىزۋ ءتارتىبىن بۇزعانى ءۇشىن" ۇستالعان. اقپارات انىقتالىپ جاتىر.

پوليتسيا وقيعاعا تۇسىنىكتەمە بەرمەدى.

وسىعان دەيىن "العا، قازاقستان" وپپوزيتسيالىق پارتياسىن قۇرۋ جونىندەگى باستاما توپ وكىلدەرى 20 قاراشادا بەيبىت ميتينگ وتكىزەتىنىن مالىمدەگەن. توپ مۇشەلەرى بۇعان دەيىن "ادىلەتسىز سايلاۋدى وتكىزبەۋدى", ساياسي قۋدالاۋدى دوعارۋدى، ساياسي پارتيالاردى تىركەۋدى تالاپ ەتكەن.

بۇعان دەيىن بيلىك تىركەلمەگەن "العا، قازاقستان" پارتياسى وكىلدەرىنىڭ "ميتينگ وتكىزۋ تۋرالى وتىنىشتەرىن" قاناعاتتاندىرماعان ەدى. بەلسەندىلەر كەزەكتەن تىس پرەزيدەنت سايلاۋى، قاڭتار وقيعاسى، ساياسي تۇتقىندار ماسەلەسى جونىندە پىكىرلەرىن ايتپاق بولعان.

حالىقارالىق قاۋىمداستىق قازاقستان بيلىگىنەن "بەيبىت جيىن وتكىزۋ تۋرالى" زاڭدى قايتا قاراپ، حالىققا ءوز ويىن ەركىن ايتۋعا كەدەرگى كەلتىرمەۋدى تالاپ ەتىپ كەلەدى. استانا ەلدەگى بەيبىت جيىندار تۋرالى زاڭ حالىقارالىق تالاپتارعا ساي دەگەن ءۋاج ايتادى.