Almatı qalasınıñ qoğamdıq damu basqarması qwqıq qorğauşılarğa qalada şeru ötkizuge tağı rwqsat bermedi. Bwl jöninde "Ar.Ruh.Haq" qoğamdıq qorınıñ jetekşisi, qwqıq qorğauşı Baqıtjan Töreğojina Facebook'tağı paraqşasında habarladı dep jazdı Ortalıq Aziya jañalıqtar qızmeti.

Baqıtjan Töreğojinanıñ aytuınşa, äkimdiktegiler olarğa 11 jeltoqsannıñ ornına 27 qaraşada miting ötkizudi wsınğan. Qwqıq qorğauşılar bas tartqan. Bwğan deyin olar şeru ötkizuge rwqsat bermegen äkimdikti sotqa bergen edi. Alğaşqı otırıs 17 qaraşada ötui tiis.

"Illyuziyağa berilmeymiz, şeşimdi sotqa berip, qaulısın alğannan keyin bwl elde zañ da, qisın da, Konstituciya da, prezident söziniñ de salmağı joq. Adam qwqığın eşkim saqtığısı kelmeydi" dep jazdı qwqıq qorğauşı. Olar soñğı jauapqa baylanıstı da sotqa şağım tüsiretinin ayttı.

Osımen äkimdik bir ayğa juıq işinde qwqıq qorğauşı Baqıtjan Töreğojina men Liberty qorınıñ jetekşisi Ğalım Ağeleuovke şeru ötkizuge ekinşi ret rwqsat bermey otır. Olar soñğı ret 8 qaraşada hat tapsırıp, 11 jeltoqsanda Mahatma Gandi alañınan bastap, Şevçenko köşesiniñ boyımen jürip, Şoqan Uälihanov alañına deyin 4 sağat şeru ötkizetinin habarlağan. Miting taqırıbın "Barlığınıñ qwqıqtarı men erkindigi saqtalsın!", "Diskriminaciyağa jol joq!" dep körsetken.

Osığan wqsas jağday aldında da qaytalanğan.

"BelsendilerEkstremistEmes" (AktivistıNeEkstremistı) qwqıq qorğau tobınıñ mälimetinşe, 2020 jıldıñ 30 şildesinen beri Qazaqstanda 22 qala men eldi mekende beybit jiın ötkizu turalı 148 ötiniş orındalmağan, 118-i biıl tirkelgen.

Qazaqstanda bıltır "Beybit jiın turalı" jaña zañ qabıldanğanmen qwqıq qorğauşılar azamattardıñ beybit jiın ötkizu jäne jinalu qwqığı äli şektelip otırğanın sınaydı. Köp jağdayda azamattardıñ beybit şeru ötkizu turalı ötinişteri orındalmaydı. Bilik köbine sol küni özge şara ötetinin nemese ötiniştiñ qajetti erejelerdi saqtay otırıp jazılmağanın nemese karantin şekteulerdi alğa tartadı. Al "rwqsat etilmegen" şarağa kelgender ädette wstalıp, äkimşilik jauapqa tartıladı. Halıqaralıq qwqıq qorğau wyımdarı Qazaqstan biligin atalğan şekteulerdi alıp tastauğa şaqırğan.

Bwğan deyin Human Right Watch halıqaralıq wyımı jäne basqa da qwqıq qorğauşılar qazaq biligin koronavirus pandemiyasın paydalanıp, adam qwqığın şektep otır dep sınağan.

"The Qazaq Times"